पाटस गोळीबार प्रकरण! सिमेंट वाहतुकीच्या वादातून हाणामारी आणि फायरिंग; दोन्ही गटांतील १० आरोपींना ९ जूनपर्यंत पोलीस कोठडी!

पुणे (दौंड):दौंड तालुक्यातील पाटस येथे सिमेंटच्या गाड्या भरण्याच्या व्यावसायिक वादातून झालेल्या भीषण हाणामारी आणि गोळीबारप्रकरणी (Patas Firing Case) पोलिसांनी मोठी कारवाई केली आहे। यवत पोलिसांनी या प्रकरणी दोन्ही गटांतील एकूण १० जणांना ताब्यात घेतले असून, न्यायालयाने सर्व आरोपींना ९ जूनपर्यंत पोलीस कोठडी सुनावली आहे। या टोळीयुद्ध आणि गोळीबारामुळे पाटस परिसरात काही काळ तीव्र भीतीचे आणि तणावाचे वातावरण निर्माण झाले होते।

नेमका वाद कशामुळे झाला?पोलिसांनी दिलेल्या माहितीनुसार, पाटस येथील गरदडे कॉम्प्लेक्स परिसरात सिमेंटची गाडी भरण्यावरून दोन गट आमनेसामने आले होते। सुरुवातीला शाब्दिक चकमक उडाली, परंतु काही वेळातच या वादाचे रूपांतर लाठ्याकाठ्या, लोखंडी गज आणि दगडांनी केलेल्या हिंसक हाणामारीत झाले। या गोंधळादरम्यान रिव्हॉल्व्हर/कट्ट्यातून गोळीबार करण्यात आला, ज्यामुळे परिसरात एकच खळबळ उडाली। तपासादरम्यान घटनास्थळी गोळी झाडण्यात आल्याचे निष्पन्न झाले असून सुदैवाने यात कोणतीही जीवितहानी झाली नाही।

दोन गटांचे परस्परविरोधी आरोपयवत पोलिसांनी दिलेल्या माहितीनुसार, दोन्ही गटांनी एकमेकांविरुद्ध गंभीर स्वरूपाच्या तक्रारी दिल्या आहेत: १. सूरज कुऱ्हाडकर गट: यांनी दिलेल्या फिर्यादीत म्हटले आहे की, सिमेंट गाडी भरण्याच्या कारणावरून झालेल्या वादात संतोष कडू आणि त्यांच्या साथीदारांनी बेकायदेशीर जमाव जमवून लोखंडी गज आणि दगडांनी जीवघेणी मारहाण केली, ज्यामध्ये ते स्वतः आणि एक साक्षीदार जखमी झाले। २. संतोष कडू गट: तर दुसरीकडे, संतोष कडू यांनी दिलेल्या फिर्यादीत आरोप केला आहे की, सूरज कुऱ्हाडकर, अजय धोत्रे, श्रीकांत पवार आणि अनिल चव्हाण यांनी त्यांना रस्त्यात अडवून शिवीगाळ व दमदाटी केली आणि यातील एका आरोपीने त्यांच्या दिशेने थेट गावठी कट्ट्याने गोळीबार केला।

अटक करण्यात आलेल्या १० आरोपींची नावे:

• पहिला गट: संतोष कडू (रा. बेटवाडी, दौंड), अण्णा गायकवाड, रावसाहेब पालवे, सुधीर फुलमाळी, रामा गायकवाड, अनिल गायकवाड (सर्व रा. जोशीवस्ती, ढोकराई फाटा, श्रीगोंदा, जि. अहिल्यानगर)।

• दुसरा गट: सूरज कुऱ्हाडकर, अजय धोत्रे, श्रीकांत पवार आणि अनिल चव्हाण (सर्व रा. अंबिका नगर, पाटस, ता. दौंड)।

यवत पोलीस ठाण्याचे पोलीस निरीक्षक नारायण देशमुख यांच्या मार्गदर्शनाखाली पोलीस पथक गोळीबारामागील नेमके कारण, बेकायदेशीर शस्त्राचा पुरवठा कुठून झाला आणि या घटनेचा मुख्य सुत्रधार कोण, याचा सखोल तपास करत आहे।