धक्कादायक! विख्यात UPSC मार्गदर्शक शुभ्रा रंजन यांना ओलीस ठेवून १.९० कोटींची लूट; माजी विद्यार्थ्याला आयसीयू मधून बेड्या

देशातील नामवंत UPSC मार्गदर्शक शुभ्रा रंजन यांच्याबाबत एक अत्यंत धक्कादायक आणि थरारक घटना समोर आली आहे. त्यांच्याच एका माजी विद्यार्थ्याने आणि माजी बिझनेस पार्टनरने त्यांना भोपाळमध्ये ओलीस ठेवून तब्बल १ कोटी ९० लाख रुपयांची खंडणी उकळल्याचा प्रकार उघडकीस आला आहे. भोपाळ गुन्हे शाखेने (Crime Branch) या प्रकरणाचा मुख्य सूत्रधार प्रियंक शर्मा याला अटक केली आहे.

नेमकी घटना काय?
मिळालेल्या माहितीनुसार, आरोपी प्रियंक शर्मा हा शुभ्रा रंजन यांचा माजी विद्यार्थी होता आणि त्यांच्या कोचिंग इन्स्टिट्यूटमध्ये त्याने कामही केले होते. त्याने शुभ्रा रंजन यांना एका व्यावसायिक मीटिंगच्या बहाण्याने भोपाळला बोलावून घेतले. तिथे त्याने त्यांना एका ठिकाणी ओलीस ठेवले आणि धमकावून त्यांच्या बँक खात्यातून तब्बल १.९० कोटी रुपये स्वतःच्या आणि आपल्या साथीदारांच्या खात्यात ट्रान्सफर करून घेतले.

अशी झाली अटक:
गुन्हा केल्यानंतर अटकेच्या भीतीने आरोपी प्रियंक शर्मा हा एका खासगी रुग्णालयातील आयसीयू (ICU) मध्ये दाखल झाला होता. मात्र, तांत्रिक तपास आणि गुप्त माहितीच्या आधारे भोपाळ गुन्हे शाखेने रुग्णालयातूनच त्याला ताब्यात घेतले. पोलिसांनी दिलेल्या माहितीनुसार, प्रियंक शर्माला या कृत्यात इतर ५ ते ६ साथीदारांनी मदत केली असून, त्यापैकी काहींना पोलिसांनी अटक केली आहे.

कारणांचा तपास सुरू:
शुभ्रा रंजन यांनी याप्रकरणी तक्रार दिल्यानंतर पोलिसांनी तातडीने चक्र फिरवली. प्रियंकने हा कट का रचला आणि यामागे आणखी काही मोठे रॅकेट आहे का, याचा तपास पोलीस करत आहेत. दरम्यान, शैक्षणिक वर्तुळात या घटनेमुळे मोठी खळबळ उडाली आहे. पोलिसांनी यातील काही रक्कम गोठवल्याची (Freeze) माहितीही समोर येत आहे.