'यम' बनून आला कंटेनर! हॉटेल पिगारासमोर पिकअपचा चेंदामेंदा; २२ वर्षीय महादेवचा जागीच अंत

पुण्यातील मुंबई-बेंगळूर राष्ट्रीय महामार्गावर नऱ्हे परिसरात आज सकाळी एक भीषण अपघात झाला. हॉटेल पिगारासमोर झालेल्या या अपघातात एका २२ वर्षीय पिकअप चालकाचा जागीच मृत्यू झाला आहे, तर त्याचा मित्र गंभीर जखमी झाला आहे.

नेमकी घटना काय?
मिळालेल्या माहितीनुसार, सोमवारी सकाळी ८:०५ च्या सुमारास कंटेनर (क्रमांक MH 04 MH 6303) चालक मुंबईच्या दिशेने भरधाव वेगाने जात होता. याच वेळी त्याने समोरून जाणाऱ्या पिकअप गाडीला (क्रमांक MH 42 AQ 6142) मागून जोरदार धडक दिली. ही धडक इतकी भीषण होती की पिकअपचा अक्षरशः चेंदामेंदा झाला. पिकअप गाडी दोन कंटेनरच्या मध्ये अडकल्याने चालकाला बाहेर पडण्याची संधीच मिळाली नाही.

एकाचा मृत्यू, एक गंभीर:
या भीषण अपघातात पिकअप चालक महादेव उत्तम शेंडे (वय २२) याचा जागीच मृत्यू झाला. त्याच्यासोबत असलेला त्याचा मित्र सुमित दत्तू कांबळे (वय २२, रा. इंदापूर) हा गंभीर जखमी झाला आहे. सुमितला तातडीने सिंहगड रोडवरील मोरया हॉस्पिटलमध्ये दाखल करण्यात आले असून त्याची प्रकृती चिंताजनक असल्याचे सांगण्यात येत आहे.

महामार्गावर वाहतूक कोंडी:
या अपघातामुळे महामार्गावरील पुढच्या गाड्यांचेही नुकसान झाले आहे. अपघातानंतर परिसरात मोठी वाहतूक कोंडी झाली होती. घटनेची माहिती मिळताच नऱ्हे पोलिसांनी घटनास्थळी धाव घेत अपघातग्रस्त वाहने बाजूला केली आणि वाहतूक सुरळीत केली. कंटेनर चालकाच्या निष्काळजीपणामुळे हा अपघात झाल्याचा प्राथमिक अंदाज पोलिसांनी व्यक्त केला असून, पुढील तपास सुरू आहे. एका तरुण मुलाचा असा दुर्दैवी अंत झाल्यामुळे नऱ्हे परिसरात मोठी हळहळ व्यक्त केली जात आहे.