Licenses of Vendors Overcharging ST Passengers Revoked

मुंबई: एसटी महामंडळाच्या वतीने सवलतधारक प्रवाशांसाठी सुरू करण्यात आलेल्या 'NCMC' स्मार्ट कार्ड विक्रीत पारदर्शकता आणण्यासाठी राज्य सरकार आता आक्रमक झाले आहे. हे कार्ड अधिकृत दरापेक्षा जास्त किमतीला विकणाऱ्या विक्रेत्यांचे परवाने तात्काळ रद्द करण्याचे कडक निर्देश परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिले आहेत.

प्रवाशांच्या तक्रारींची गंभीर दखल
राज्यभरात ३००० हून अधिक विक्रेत्यांच्या माध्यमातून या स्मार्ट कार्ड्सचे वितरण सुरू आहे. मात्र, काही ठिकाणी विक्रेते प्रवाशांकडून कार्डसाठी जादा पैसे उकळत असल्याच्या तक्रारी प्रशासनाला प्राप्त झाल्या होत्या. याची गंभीर दखल घेत, अवाजवी दर आकारणाऱ्या काही विक्रेत्यांचे परवाने आधीच रद्द करण्यात आले असून, इतर विक्रेत्यांनाही हा शेवटचा इशारा असल्याचे मंत्री सरनाईक यांनी स्पष्ट केले आहे.

काय आहेत कार्डचे अधिकृत दर?
महामंडळाने कार्डसाठी खालीलप्रमाणे दर निश्चित केले आहेत:

नवीन NCMC कार्ड: १९९ रुपये.
जुन्या स्मार्ट कार्डऐवजी नवीन कार्ड: १४९ रुपये.
या दरापेक्षा एक रुपयाही जास्त मागितल्यास प्रवाशांनी तक्रार करण्याचे आवाहन करण्यात आले आहे.

डिजीटल प्रवासाकडे एसटीचे पाऊल
एसटी महामंडळाने प्रवाशांना दिल्या जाणाऱ्या सवलती अधिक सुसंगत आणि पारदर्शक करण्यासाठी NCMC (National Common Mobility Card) कार्यप्रणाली लागू केली आहे. सध्या महिला, ज्येष्ठ नागरिक आणि 'अमृत' ज्येष्ठ नागरिक यांची नोंदणी व कार्ड वितरण प्रक्रिया सुरू असून, टप्प्याटप्प्याने इतर सवलतधारक प्रवाशांचाही यात समावेश केला जाणार आहे. भविष्यात सवलतधारकांसाठी हे कार्ड वापरणे अनिवार्य केले जाणार असल्याने सवलतींचा लाभ अचूक आणि डिजीटल पद्धतीने देणे शक्य होईल.

आगार व्यवस्थापकांना सतर्कतेचे आदेश
NCMC कार्डद्वारे तिकीट वितरण, टॉप-अप आणि इतर व्यवहारांसाठी एकसंध मानक कार्यपद्धती (SOP) निश्चित करण्यात आली आहे. सर्व आगार व्यवस्थापकांनी ही कार्यपद्धती काटेकोरपणे राबवावी आणि प्रवाशांना कार्ड मिळवताना कोणतीही अडचण येऊ नये, यासाठी आवश्यक ती दक्षता घेण्याचे आदेशही महामंडळाने दिले आहेत.