उत्तर प्रदेश: प्रशासकीय हलगर्जीपणाचा कळस! उत्तर प्रदेशमधील पूरग्रस्त भागात मदत म्हणून वाटले एक्स्पायर्ड कफ सिरप, लहान मुलांची प्रकृती बिघडली

उत्तर प्रदेश: कानपूर येथे पांडु नदीच्या पाण्याची पातळी वाढल्याने बर्रा मायापुरम भागातील नागरिक पुराच्या संकटाचा सामना करत आहेत. घरात साचलेलं पाणी आणि आजारांचा धोका या परिस्थितीत मदतीची वाट पाहणाऱ्या नागरिकांना धक्कादायक अनुभव आला आहे. आरोग्य विभागाने वाटप केलेल्या औषधांमध्ये एक्स्पायर्ड सिरप दिल्याचा प्रकार समोर आला आहे. जुलै २०२६ मध्येच एक्स्पायर्ड झालेलं सिरप प्यायल्याने अनेक लहान मुलांची प्रकृती बिघडल्याचा आरोप पालकांनी केला आहे.

औषध प्यायल्यानंतर मुलांना उलट्या सुरू झाल्याने पालकांनी त्यांना तातडीने डॉक्टरांकडे नेलं. तेथे योग्य उपचार मिळाल्यानंतर मुलांच्या प्रकृतीत सुधारणा झाली. सोमवारी दुपारी आरोग्य विभागाचं पथक मायापुरम भागात २० कुटुंबांना औषधं वाटण्यासाठी आलं होतं. पूरग्रस्तांना आजारांपासून वाचवण्यासाठी वाटण्यात आलेल्या औषधांमध्ये एका सिरपचाही समावेश होता. हे सिरप एक्स्पायर्ड झाल्याचा आरोप आहे.

सिरप प्यायल्यानंतर उलट्या सुरू
जयपाल आणि मीना यांच्या चार वर्षांच्या मुलाने हे सिरप प्यायल्यानंतर त्याला उलट्या सुरू झाल्या. मुलाची तब्येत बिघडल्याने कुटुंबीयांनी त्याला तातडीने डॉक्टरांकडे नेलं. उपचारानंतर रिषभ नावाच्या या मुलाची प्रकृती स्थिर झाली. याचप्रमाणे सोनम आणि रिंकू यांचा तीन वर्षांचा मुलगा रुद्र, तसेच अंकिता आणि अजय यांचा तीन वर्षांचा मुलगा आयुष यांची प्रकृतीही हे औषध प्यायल्यानंतर बिघडल्याचे समोर आलं आहे.

 

 

परिसरात भीतीचं वातावरण
एकाच वेळी अनेक मुलांची प्रकृती बिघडल्याने परिसरात भीतीचं वातावरण निर्माण झालं. संतप्त नागरिकांनी एक्स्पायर्ड सिरप आणि इतर औषधे फेकून दिली. मंगळवारी जेव्हा आरोग्य विभागाचे पथक पुन्हा औषधं घेऊन मायापुरम भागात पोहोचले, तेव्हा पूरग्रस्तांनी औषधं घेण्यास स्पष्ट नकार दिला. मदतीच्या नावाखाली वाटल्या जाणाऱ्या औषधांवरच प्रश्न उपस्थित होत असताना आम्ही आमच्या मुलांचा जीव धोक्यात घालू शकत नाही, अशी भूमिका नागरिकांनी घेतली.

उपचारासाठी दिले १०० रुपये; नागरिकांचा घेण्यास नकार
एक्स्पायर्ड सिरपबाबत माहिती घेण्याचा प्रयत्न केला असता, आरोग्य विभागाचे पथक घटनास्थळी पोहोचले. मीना यांनी सांगितलं की, आरोग्य विभागाच्या पथकाने चुकून एक्स्पायर्ड सिरप दिल्याचं मान्य केलं आणि मुलाच्या उपचारासाठी १०० रुपये देण्याची तयारी दर्शवली. मात्र पीडित कुटुंबाने हे पैसे घेण्यास नकार दिला. या घटनेने सर्वांनाच मोठा धक्का बसला आहे.