काळाचा क्रूर घाला! कोमात असलेल्या सख्ख्या भावाच्या उपचारासाठी पैसे घेऊन निघालेल्या तरुणाचा भीषण अपघातात मृत्यू!

जिंतूर/नांदेड: जिंतूर-छत्रपती संभाजीनगर महामार्गावरील रायखेडा पाटीजवळ एक अत्यंत हृदयद्रावक आणि दुर्दैवी अपघाताची घटना घडली आहे. मागील दीड महिन्यांपासून छत्रपती संभाजीनगर येथील रुग्णालयात मृत्यूशी झुंज देत असलेल्या आणि कोमात असलेल्या सख्ख्या भावाच्या उपचारासाठी पैशांची व्यवस्था करून दुचाकीने निघालेल्या २५ वर्षीय तरुणाचा अज्ञात वाहनाच्या धडकेत जागीच मृत्यू झाला. अनिल देवीदास सुर्वे (वय २५, रा. दताड, ता. सेनगाव, जि. हिंगोली) असे या दुर्दैवी अपघातात जीव गमावलेल्या तरुणाचे नाव आहे. या घटनेमुळे संपूर्ण परिसरात तीव्र हळहळ व्यक्त होत आहे.

मित्रासह निघाला होता उपचाराचा खर्च घेऊन: मिळालेल्या माहितीनुसार, अनिल सुर्वे यांचा सख्खा भाऊ मागील दीड महिन्यांपासून रुग्णालयात कोमात आहे. त्याच्या महागड्या उपचारासाठी पैशांची अत्यंत गरज असल्याने अनिलने पैशांची जुळवाजुळव केली होती. ते पैसे घेऊन तो आपल्या संकेत दत्ता बेले (वय २५, रा. पुसद) या मित्रासह दुचाकीवरून जिंतूरमार्गे छत्रपती संभाजीनगरच्या दिशेने जात होता. रविवारी सकाळी साडेसात वाजेच्या सुमारास रायखेडा पाटीजवळ त्यांच्या दुचाकीला एका अज्ञात वाहनाने जोरदार धडक दिली. ही धडक इतकी भीषण होती की दोघेही रस्त्यावर गंभीर जखमी अवस्थेत रक्ताच्या थारोळ्यात पडले.

कुटुंबावर दुःखाचा डोंगर, लहान मुलगी झाली पोरकी:अपघाताची माहिती मिळताच स्थानिक नागरिकांनी तातडीने मदतकार्य करत दोघांनाही जिंतूर ग्रामीण रुग्णालयात दाखल केले. मात्र, तिथल्या वैद्यकीय अधिकाऱ्यांनी तपासणी अंती अनिल सुर्वे याला मृत घोषित केले. तर त्याचा मित्र संकेत बेले हा गंभीर जखमी असून त्याच्या डोक्याला आणि हातापायाला मोठी दुखापत झाली आहे, त्याच्यावर सध्या जिल्हा रुग्णालयात उपचार सुरू आहेत. मृत अनिल सुर्वेच्या पश्चात पत्नी आणि एक लहान मुलगी असा परिवार आहे. एकीकडे भाऊ कोमात असताना, दुसरीकडे कुटुंबाचा आधार असलेल्या अनिलचा अशा अपघाती मृत्यूनंतर सुर्वे कुटुंबावर दुःखाचा डोंगर कोसळला आहे.