पुणे: बारामतीत खळबळ! झुंबा डान्स क्लासवर कारवाई न करण्यासाठी ५ लाखांची लाच स्वीकारताना पोलीस हवालदार एसीबीच्या जाळ्यात

पुणे: जिल्ह्यातील बारामतीमधून एक अत्यंत खळबळजनक बातमी समोर आली आहे. बारामती तालुका पोलीस ठाण्यात दाखल असलेल्या एका अर्जावर कोणतीही कारवाई न करण्यासाठी तब्बल ५ लाख रुपयांची लाच स्वीकारताना एका पोलीस हवालदाराला लाचलुचपत प्रतिबंधक विभागाने (ACB) रंगेहात अटक केली आहे. महेश अंकुश उगले (वय ३६, ब. नं. २६३७) असे लाचखोर पोलीस हवालदाराचे नाव असून, या कारवाईमुळे पोलीस वर्तुळात प्रचंड उडाली आहे.

मिळालेल्या सविस्तर माहितीनुसार, तक्रारदाराची पत्नी बारामतीत झुंबा डान्स क्लास आणि जिम चालवते. या डान्स क्लासमुळे त्रस्त झालेल्या काही नागरिकांनी क्लास तसेच तक्रारदार व त्यांच्या पत्नीविरुद्ध कायदेशीर कारवाई करण्याबाबत बारामती तालुका पोलीस ठाण्यात एक अर्ज दिला होता. हा अर्ज चौकशीसाठी पोलीस हवालदार महेश उगले याच्याकडे वर्ग करण्यात आला होता. या प्राप्त अर्जावर कोणतीही कायदेशीर कारवाई न करण्यासाठी आणि प्रकरण मिटवण्यासाठी पोलीस हवालदार उगले याने चक्क ७ लाख रुपयांच्या लाचेची मागणी केली होती. याप्रकरणी त्रस्त नागरिकाने ७ सप्टेंबर रोजी लाचलुचपत प्रतिबंधक विभागाकडे (ACB) अधिकृत तक्रार नोंदवली होती.

 

 

तक्रारीच्या आधारे एसीबीच्या पथकाने त्याच दिवशी पंचांसमक्ष लाचेच्या मागणीची पडताळणी केली. या पडताळणी दरम्यान पोलीस हवालदार उगले याने ७ लाख रुपयांची मागणी केल्याचे आणि त्यापैकी २ लाख रुपयांची रक्कम यापूर्वीच स्वीकारल्याचे निष्पन्न झाले. त्यानंतर ठरल्याप्रमाणे मंगळवारी (८ सप्टेंबर २०२६) बारामती शहरातील माळेगाव रोडवरील पी.डी.सी.सी. बँकेच्या परिसरामध्ये एसीबीच्या पथकाने सापळा रचला. तक्रारदाराकडून उर्वरित ५ लाखांची रक्कम स्वीकारत असतानाच दबा धरून बसलेल्या एसीबीच्या पथकाने पोलीस हवालदार महेश उगले याला रंगेहात पकडले.

या धडक कारवाईनंतर बारामती शहर पोलीस ठाण्यात भ्रष्टाचार प्रतिबंधक अधिनियम, १९८८ अन्वये गुन्हा दाखल करण्याची कायदेशीर प्रक्रिया सुरू करण्यात आली आहे. पोलीस दलातीलच एका कर्मचाऱ्याने अशा प्रकारे लाच घेतल्यामुळे सर्वसामान्यांमध्ये तीव्र संताप व्यक्त होत असून, लाचलुचपत प्रतिबंधक विभागाच्या या कारवाईचे सर्वत्र कौतुक होत आहे.