अशोकमामा आणि निवेदिता सराफ यांच्या पारंपरिक लूकने वेधलं जगाचं लक्ष; 'त्या' एका कृतीने जिंकली मनं!

कान्स (फ्रान्स): फ्रान्समध्ये सुरू असलेल्या अत्यंत प्रतिष्ठित अशा ७९ व्या 'कान्स फिल्म फेस्टिव्हल २०२६' (Cannes Film Festival 2026) मधून महाराष्ट्रासाठी एक अतिशय अभिमानास्पद आणि आनंदाची बातमी समोर आली आहे. मराठी चित्रपटसृष्टीतील ज्येष्ठ आणि अष्टपैलू अभिनेते 'महाराष्ट्र भूषण' अशोक सराफ आणि त्यांच्या पत्नी, अभिनेत्री निवेदिता सराफ यांनी कान्सच्या रेड कार्पेटवर हजेरी लावली आहे. आंतरराष्ट्रीय स्तरावर वावरताना या दिग्गज जोडीने आपली मराठी संस्कृती आणि पारंपरिक बाज जपल्याचे पाहायला मिळाले. त्यांच्या या रॉयल लूकने कान्स फेस्टिव्हलमध्ये उपस्थित सर्वांचे लक्ष वेधून घेतले आहे.

'अभिजात मराठी'च्या ग्लोबल लाँचसाठी उपस्थिती
यंदा कान्स फेस्टिव्हलमध्ये 'अभिजात मराठी' या नव्या ओटीटी प्लॅटफॉर्मचे ग्लोबल लाँच करण्यात आले. याच खास सोहळ्यानिमित्त आणि मराठीचे प्रतिनिधित्व करण्यासाठी अशोक सराफ, निवेदिता सराफ, लोकप्रिय अभिनेत्री प्राजक्ता माळी, 'कोकण हार्टेड गर्ल' अंकिता वालावलकर आणि केदार जोशी हे कान्समध्ये दाखल झाले आहेत. 'भारत पव्हेलियन'मध्ये या सर्वांनी हजेरी लावून मराठी पाऊल आंतरराष्ट्रीय स्तरावर अभिमानाने पुढे टाकले आहे.

पारंपरिक लूकने जिंकली जगभरातील प्रेक्षकांची मनं
कान्सच्या रेड कार्पेटवर पाश्चात्य आणि ग्लॅमरस कपड्यांची फॅशन पाहायला मिळत असताना, सराफ दांपत्याने मात्र मराठमोळा थाट पसंत केला. अभिनेते अशोक सराफ यांनी पांढऱ्या रंगाचा राजेशाही सूट आणि काळ्या रंगाची पॅन्ट असा देखणा लूक केला होता. तर अभिनेत्री निवेदिता सराफ यांनी सुंदर हिरव्या रंगाची काठापदराची पारंपरिक पैठणी साडी नेसली होती. गळ्यात पारंपरिक दागिने, नाकात नथ आणि केसांत सुवासिक गजरा माळून जेव्हा निवेदिता सराफ रेड कार्पेटवर उतरल्या, तेव्हा त्यांच्या सौंदर्याने आणि साधेपणाने सर्वांनाच भुरळ पाडली.

अशोकमामांच्या 'त्या' कृतीची जगभर चर्चा!
रेड कार्पेटवर एन्ट्री करताच अशोक सराफ यांनी आंतरराष्ट्रीय फोटोग्राफर्स आणि माध्यमांसमोर दोन्ही हात जोडून अत्यंत नम्रपणे 'नमस्कार' केला. पाश्चात्य संस्कृतीच्या झगमगाटातही आपली भारतीय संस्कृती आणि संस्कार न विसरणाऱ्या अशोकमामांच्या या मन जिंकणाऱ्या कृतीचे (गेस्चर) सोशल मीडियावर कौतुक होत आहे. त्यांच्या या कृतीने संपूर्ण महाराष्ट्राची मान उंचावली आहे. विशेष म्हणजे, त्यांचा मुलगा अनिकेत सराफ हा देखील या सोहळ्यासाठी फ्रान्समध्ये उपस्थित असून त्याने आई-वडिलांचे सुंदर फोटो शेअर करत आपला अभिमान व्यक्त केला आहे.