Pune : कॅम्पातील बर्गर किंगच पुण्यात किंग! व्यापारचिन्ह गैरवापराचा अमेरिकेतील बर्गर किंग कॉर्पोरेशनचा दावा जिल्हा न्यायालयाने फेटाळला

समान नावावरुन लष्कर भागातील बर्गर किंग आणि अमेरिकेतील बर्गर किंग काॅर्पोरेशन यांच्यात वाद होता. अमेरिकेतील बर्गर किंग काॅर्पोरेशनने दाखल केलेल्या खटल्यात जिल्हा न्यायाधीश सुनील वेदपाठक यांनी बर्गर किंगच्या बाजूने निकाल दिला. अमेरिकेच्या बर्गर किंग कॉर्पोरेशनने भारतातील प्रतिनिधी पंकज पाहुजा यांच्यामार्फत कोरेगाव पार्क आणि लष्कर भागातील ‘मेसर्स बर्गर किंग’चे मालक अनाहिता आणि शापूर इराणी यांच्याविरुद्ध दिवाणी दावा दाखल केला होता. व्यापारचिन्ह उल्लंघन, नुकसान भरपाई, पुण्याच्या बर्गर किंगला व्यापार चिन्हाच्या (ट्रेड मार्क) वापरावर कायमस्वरूपी मनाई, अशा प्रतिबंधक आदेशांसाठी अमेरिकेच्या बर्गर किंगकडून दावा दाखल करण्यात आला होता. यात ‘बर्गर किंग’च्यावतीने ॲड. ए. डी. सरवटे, ॲड. सृष्टी आंगणे आणि ॲड. राहुल परदेशी यांनी बाजू मांडली.

अमेरिकेतील फ्लोरिडा राज्यात बर्गर किंग काॅर्पोरेशन कंपनीची स्थापना १९५४ मध्ये जेम्स मॅक्लामोर आणि डेव्हिड एडगर्टन यांनी स्थापन केली होती. त्यांनी ‘बर्गर किंग’ नावाने हॉटेल सुरू केले होते. या साखळी उपाहारगृह उद्योगाच्या अमेरिकेसह जगभरात शंभराहून अधिक देशांत १३ हजार शाखा आहेत. ‘बर्गर किंग’ हे व्यापार चिन्ह आणि व्यावसायिक नाव १९५४ पासून ते वापरत आहेत. या कंपनीने २०१४ पासून नवी दिल्लीत आणि नंतर मुंबई आणि पुण्यात उपाहारगृह सुरू केली. कंपनीला २००८ मध्ये पुण्यात सारख्याच नावाने आधीच एक उपहारगृह सुरू केल्याची माहिती मिळाली. त्यामुळे अमेरिकेच्या कंपनीने जून २००९ मध्ये आपल्या वकिलांमार्फत पुण्यातील ‘बर्गर किंग’ला आपला व्यवसाय थांबवण्याची नोटीस बजावून सामंजस्याने हे प्रकरण मिटविण्याचा प्रस्ताव दिला होता. मात्र, या प्रकरणात तडजोड झाली नाही.