गॅससाठी वनवास : ४० अंशांच्या उन्हात नागरिक रांगेत; संभाजीनगरमध्ये सिलिंडरचा भीषण तुटवडा

छत्रपती संभाजीनगर |शहरात सध्या उन्हाचा तडाखा वाढत असतानाच, सर्वसामान्य नागरिकांना आता गॅस सिलिंडरसाठीही प्रचंड संघर्ष करावा लागत आहे. गेल्या दोन महिन्यांपासून गॅस पुरवठा विस्कळीत झाल्याने
नागरिकांमध्ये संतापाची लाट आहे. रणरणत्या उन्हात तासनतास रांगेत उभे राहूनही रिकाम्या हाताने घरी परतण्याची वेळ अनेक ग्राहकांवर आली आहे.

३५ किलोमीटरचा प्रवास, तरीही प्रतीक्षाच
गॅस टंचाईची तीव्रता इतकी भीषण आहे की, पैठण तालुक्यातील बिडकीन डी एमआयसी सारख्या दूरच्या भागातून नागरिक तब्बल ३५ किलोमीटरचा प्रवास करून हायकोर्ट कॉलनीतील वितरण केंद्रावर येत आहेत. "दोन महिन्यांपासून चकरा मारून हैराण झालो आहोत, ही माझी चौथी फेरी आहे," अशी हतबलता एका ग्राहकाने व्यक्त केली. ग्रामीण भागात तर ४५ दिवसांनंतर बुकींग होते आणि त्यानंतरही १५ दिवस वाट पाहावी लागते, असे चित्र आहे.

प्रशासनाचे दावे फोल?
अमेरिका आणि इराण युद्धाचा परिणाम पुरवठ्यावर झाल्याचे सांगितले जात असले तरी, केंद्र आणि राज्य प्रशासनाने सर्व काही सुरळीत असल्याचे दावे केले आहेत. मात्र, प्रत्यक्षात चित्र वेगळेच आहे. साताऱ्यातील अहिल्या एचपी गॅस वितरण केंद्रावर दररोज सकाळी ९ वाजेपासून दीड ते दोनशे नागरिक रांगेत उभे राहत आहेत.

उन्हामुळे नागरिक बेशुद्ध
शहराचे तापमान ४० अंशांच्या पुढे गेल्याने रांगेत उभ्या असलेल्या नागरिकांना चक्कर येण्याचे प्रकार घडत आहेत. "उन्हाची तीव्रता इतकी आहे की साधा पिण्याचा पाण्याचाही पत्ता नाही. सरकारने किमान गॅस तरी वेळेवर द्यावा, जेणेकरून जेवण तरी वेळेवर मिळेल," अशी मागणी महिला ग्राहकांकडून होत आहे.

ओटीपीचा तांत्रिक घोळ-
अनेकांना २७ एप्रिलला मिळालेले ओटीपी १ मे रोजी अचानक रद्द करण्यात आले. त्यामुळे ग्राहकांना पुन्हा रांगेत उभे राहून नवीन ओटीपी घ्यावा लागत आहे. तांत्रिक कारणांमुळे नागरिकांचा कामाचा पूर्ण दिवस वाया जात असून आर्थिक फटकाही सहन करावा लागत आहे.

महत्वाचे मुद्दे:
लग्नाचा हंगाम: सध्या लग्नसराई सुरू असताना गॅस मिळत नसल्याने कुटुंब प्रमुख हवालदिल झाले आहेत.
होम डिलिव्हरी बंद: घरपोच सेवा मिळत नसल्याने नागरिक स्वतः टेम्पो किंवा रिक्षा करून लांबून सिलिंडर नेत आहेत.
मागणी: प्रशासनाने तातडीने हस्तक्षेप करून गॅस पुरवठा सुरळीत करण्याची मागणी होत आहे