नराधमाला जिवंत जाळा; नसरापूर प्रकरणातील आरोपीच्या पत्नीचीच मागणी, स्वतःच्या मुलालाही वाटतेय बापाची लाज

पुणे | भोर तालुक्यातील नसरापूर येथे ४ वर्षीय चिमुकलीवर बलात्कार करून तिची निर्घृण हत्या करणाऱ्या ६५ वर्षीय नराधमाविरुद्ध संपूर्ण महाराष्ट्रात संतापाची लाट उसळली आहे. या प्रकरणातील सर्वात धक्कादायक बाब म्हणजे, खुद्द आरोपीच्या कुटुंबानेच त्याच्या कृत्याचा तीव्र निषेध केला असून, "त्याला फाशी नको, तर दगडाने ठेचून जिवंत जाळा," अशी आर्त आणि संतापजनक मागणी आरोपीच्या पत्नीने केली आहे.

पत्नीने फिरवली पाठ; १० वर्षांपासून संबंध तोडले
एका वृत्तवाहिनीशी बोलताना आरोपीच्या पत्नीने आपला संताप व्यक्त केला. "अशा नराधमाचे तोंडही पाहायची माझी इच्छा नाही. त्याचा अंतविधी झाला तरी मला कुणी सांगू नये. गेल्या १० वर्षांपासून आमचा त्याच्याशी कोणताही संबंध नाही, पण त्याचे नाव आमच्या नावाशी जोडले गेल्याने आम्हाला समाजाचे बोल ऐकावे लागत आहेत," असे त्या म्हणाल्या. ज्या ठिकाणी त्या चिमुकलीची हत्या झाली, त्याच ठिकाणी त्याला ठेचून मारावे, तरच माझ्या मनातील आग शांत होईल, अशा शब्दांत त्यांनी आपल्या पतीबद्दलचा तिरस्कार व्यक्त केला.

"मला बाप म्हणवून घेण्याची लाज वाटतेय" - मुलगा
आरोपीच्या मुलानेही या घटनेवर तीव्र दुःख व्यक्त केले आहे. "त्या चिमुकलीवर अमानुश अत्याचार करणाऱ्या त्या माणसाला माझे वडील म्हणवून घेताना मला लाज वाटत आहे. मला ११ भाचा-भाची आहेत, ती मुलगीही मला माझ्या भाचीसारखीच होती. आपण शिवछत्रपतींच्या महाराष्ट्रात राहतो, येथे अशा नराधमांना कठोर शासन झालेच पाहिजे," अशी भावना त्याने व्यक्त केली.

गुन्हेगारीचा जुना इतिहास
पोलिसांनी दिलेल्या माहितीनुसार, आरोपीचा इतिहास अत्यंत काळा आहे. २०१५ मध्येही त्याने एका अल्पवयीन मुलीवर बलात्कार केला होता, ज्यामध्ये त्याला 'पोक्सो' अंतर्गत शिक्षा झाली होती. इतकेच नव्हे तर, यापूर्वी गावकऱ्यांनी त्याची धिंड काढून त्याला गावातून हाकलून दिले होते. आरोपीला स्वतःला सात मुली आहेत, तरीही त्याने हे पाशवी कृत्य केले. एका वृद्ध महिलेलाही त्याने आपल्या वासनेचा बळी बनवल्याची चर्चा परिसरात आहे.

नेमकी घटना काय?
१ मे रोजी या नराधमाने गावातील ४ वर्षीय चिमुकलीचा पाठलाग करून तिच्यावर अत्याचार केला आणि त्यानंतर पुरावा नष्ट करण्यासाठी तिची दगडाने ठेचून हत्या केली. तिचा मृतदेह त्याने शेणाच्या ढिगाऱ्याखाली गाडून टाकला होता. सीसीटीव्ही फुटेजच्या आधारे पोलिसांनी या नराधमाच्या मुसक्या आवळल्या आहेत. सध्या संपूर्ण परिसरातून आरोपीला तात्काळ फाशी देण्याची मागणी होत आहे.