छत्रपती संभाजीनगर: मालमत्तेच्या वादातून पोटच्या मुलाने केली ८२ वर्षीय वृद्ध वडिलांची भररस्त्यात हत्या; बहीण गंभीर जखमी.

छत्रपती संभाजीनगर: शहरातील सिल्क मिल कॉलनी परिसरात एक अत्यंत संतापजनक आणि धक्कादायक घटना घडली आहे. मालमत्तेच्या वादातून एका निर्दयी मुलाने आपल्या ८२ वर्षीय निवृत्त वडिलांची भररस्त्यात चाकूने वार करून हत्या केली. या जीवघेण्या हल्ल्यात मयत वडिलांची मुलगी (आरोपीची बहीण) देखील गंभीर जखमी झाली असून, तिच्यावर रुग्णालयात उपचार सुरू आहेत.

नेमकी घटना काय?
मयत व्यक्तीचे नाव जाफर कमरुद्दीन सय्यद पटेल (वय ८२) असे असून, ते जलसंपदा विभागातून निवृत्त अधिकारी होते. आरोपी अब्दुल रहेमान अब्दुल जाफर हा जाफर पटेल यांचा मुलगा आहे. गेल्या अनेक दिवसांपासून पिता-पुत्रांमध्ये घराच्या मालकी हक्कावरून वाद सुरू होता आणि यासंदर्भात न्यायालयात खटलाही प्रलंबित होता.

 

गुरुवारी, ११ जून रोजी न्यायालयाने या मालमत्तेबाबतचा निकाल जाफर पटेल यांच्या बाजूने दिला. निकालानंतर, जाफर पटेल यांनी कायदेशीर प्रक्रियेद्वारे घराचा ताबा मिळवला आणि ते आपल्या मुलीसोबत रिक्षाने आनंदाने घरी परतत होते. मात्र, याच दरम्यान आरोपी मुलाने त्यांना गाठले आणि भररस्त्यात चाकूने त्यांच्यावर सपासप वार केले. वडिलांना वाचवण्याच्या प्रयत्नात असलेल्या बहिणीवरही त्याने हल्ला केला, ज्यामध्ये ती गंभीर जखमी झाली. या घटनेने परिसरात एकच खळबळ उडाली आहे. पोलीस या प्रकरणाचा अधिक तपास करत आहेत.