पामबीच मार्गावर थरारक अपघात अन् 'ड्रग्ज'चा काळाबाजार उघड! कारमधून ७० लाखांची अफू, पिस्तूल आणि जिवंत काडतुसे जप्त; चालक फरार!

नवी मुंबई: नवी मुंबईतील अत्यंत उच्चभ्रू समजल्या जाणाऱ्या पामबीच मार्गावरील एका भरधाव कारच्या अपघातामुळे पोलिसांच्या हाती तब्बल ७० लाख रुपयांच्या अफूचे (Opium) मोठे घबाड लागले आहे. या अपघाताने ड्रग्ज तस्करांचा एक मोठा काळाबाजार उघड केला आहे. विशेष म्हणजे केवळ अमली पदार्थच नव्हे,
तर या कारमधून पोलिसांनी एक देशी बनावटीचे पिस्तूल, सहा जिवंत काडतुसे आणि संशयास्पद केमिकलही जप्त केले आहे. टायर फुटल्याने अपघात, चालक फरार:ही घटना शुक्रवारी (२२ मे) पहाटे साडेचारच्या सुमारास घडली. पामबीच मार्गावरून सीबीडी-बेलापूरच्या दिशेने जाणारी एक भरधाव एमजी हेक्टर कार (क्रमांक RJ 19 CK 4207) नेरूळ ट्रॅफिक सिग्नलजवळ आली असता, तिचा टायर फुटला. यामुळे चालकाचे कारवरील नियंत्रण सुटले आणि कार थेट रस्त्यावरील रेलिंग व ट्रॅफिक आयलंडला जाऊन धडकली. या भीषण अपघातात कारचा पुढचा भाग पूर्णपणे चक्काचूर झाला आणि सीसीटीव्ही कॅमेऱ्याचा खांबही तुटला. मात्र, पोलीस घटनास्थळी पोहोचण्यापूर्वीच कारचालक गाडी सोडून पळून जाण्यात यशस्वी झाला.

कारमधून उग्र वास आल्याने संशय बलवला:अपघाताची माहिती मिळताच सीवूड वाहतूक शाखेचे पोलीस कर्मचारी घटनास्थळी दाखल झाले. कारची पाहणी करताना त्यांना आतून एक तीव्र आणि उग्र वास येत असल्याचे जाणवले. संशय आल्याने पोलिसांनी कारच्या मागील डिग्गीची (Boot) झडती घेतली. तेव्हा त्यांना प्लास्टिकच्या ३ गोण्या आढळल्या, ज्यामध्ये सुमारे ६९ ते ७० किलो अफू भरलेला होता. आंतरराष्ट्रीय बाजारात या अफूची किंमत ७० लाख रुपये इतकी आहे. कारमध्ये सापडले पिस्तूल आणि केमिकल:पोलिसांनी कारच्या डॅशबोर्डची तपासणी केली असता, त्यामध्ये एक देशी बनावटीचे पिस्तूल आणि ६ जिवंत काडतुसे सापडली.

याशिवाय कारमध्ये १५ ते २० लिटर संशयास्पद केमिकलचे डबेही आढळले असून ते प्रयोगशाळेत (Lab) तपासणीसाठी पाठवण्यात आले आहे. राजस्थान कनेक्शन आणि पोलिसांचा तपास:सहायक पोलीस आयुक्त मयूर भुजबळ यांनी दिलेल्या माहितीनुसार, ही कार राजस्थानमधील गणपत बीरबल राम यांच्या नावावर नोंदणीकृत आहे. पामबीच मार्गावर अपघातांच्या घटना नेहमीच घडतात, मात्र अपघातातून इतक्या मोठ्या प्रमाणावर शस्त्रे आणि ड्रग्जचा साठा उघडकीस येण्याची ही पहिलीच घटना आहे. याप्रकरणी एनआरआय तटीय पोलिसांनी (NRI Coastal Police) अज्ञात आरोपींविरुद्ध एनडीपीएस (NDPS
Act) आणि बेदरकारपणे वाहन चालवल्याप्रकरणी गुन्हा दाखल केला असून फरार चालकाचा शोध सुरू केला आहे.