कल्याण पोलिसांची ऐतिहासिक कामगिरी! तब्बल ३४ कोटी १८ लाखांचे हेरॉईन जप्त; कुख्यात 'पठाण गँग'चा म्होरक्या ५ साथीदारांसह गजाआड!

कल्याण: अमली पदार्थांच्या तस्करीप्रकरणी कल्याणचे पोलीस उपायुक्त आणि अमली पदार्थ विरोधी पथकाने (Anti-Narcotics Cell) ठाणे जिल्ह्यातील आजवरच्या इतिहासातील सर्वांत मोठी कारवाई केली आहे. पोलिसांनी आंतरराज्यीय अमली पदार्थ तस्कर टोळीचा म्होरक्या अमजद पठाण याच्यासह एकूण पाच जणांना अटक केली असून, त्यांच्याकडून तब्बल ३४ कोटी १८ लाख रुपये किमतीचे ९ किलोपेक्षा जास्त वजनाचे उच्च दर्जाचे हेरॉईन (गर्द) जप्त केले आहे.

गस्तीदरम्यान संशयातून लागला छडा:
या संपूर्ण मोठ्या कारवाईची सुरुवात १ एप्रिल रोजी झाली. कल्याण पश्चिमेकडील सांगळेवाडी परिसरात सकाळी साडेसात वाजण्याच्या सुमारास अमली पदार्थ विरोधी पथकाची गस्त सुरू होती. यावेळी तेथे दोन व्यक्ती संशयास्पदरीत्या फिरताना आढळल्या. पोलिसांनी त्यांना हटकले असता त्यांनी पळून जाण्याचा प्रयत्न केला, मात्र पथकाने त्यांना पाठलाग करून तात्काळ ताब्यात घेतले. त्यांच्या पाठीवरील बॅगेची झडती घेतली असता, पोलिसांनी त्यामध्ये तब्बल ९ किलो २३६ ग्रॅम हेरॉईन सापडले, ज्याची बाजारभावाप्रमाणे किंमत ३२ कोटी ३२ लाख ६० हजार रुपये आहे. पोलिसांनी कासीम अब्दुल सत्तार वसईकर (३८) आणि कृष्णा नागप्पा हळेमणी (३६) या दोघांना अटक केली.

घराच्या झडतीतून आणखी साठा जप्त:
पोलीस कोठडीत असताना आरोपी कासीम वसईकर याच्या शहापूर येथील घराची झडती घेण्यात आली. तेव्हा पोलिसांनी त्याच्या घरातून आणखी ५३१.६९ ग्रॅम हेरॉईन मिळाले, ज्याची किंमत सुमारे १ कोटी ८५ लाख ८५ हजार रुपये आहे.

नाशिक-कल्याण-मुंबई कनेक्शन आणि किंगपिनला अटक:
पोलीस उपायुक्त अतुल झेंडे, अधिकारी अनिल गायकवाड आणि जितेंद्र ठोके यांच्या पथकाने सखोल तपास केला असता, या आंतरराज्यीय रॅकेटचा मुख्य सूत्रधार आणि किंगपिन कुख्यात अमजद युसूफ पठाण (४७) असल्याचे समोर आले. या टोळीचे जाळे नाशिकहून कल्याणमार्गे मुंबईत अमली पदार्थांचा पुरवठा करत होते. अमजद पठाण हा कासिम आणि सद्दाम शेखला माल पुरवायचा आणि ते दोघे कृष्णा व गणेश जंगमार ऊर्फ अण्णा (७१) यांच्या माध्यमातून मुंबई-ठाण्यात त्याचे वितरण करत होते. पोलिसांनी सद्दाम शेख आणि गणेश जंगमार यांनाही अटक केली.

मुख्य सूत्रधार अमजद पठाण हा नाशिक जिल्ह्यातील इगतपुरी येथे लपून बसला होता. पोलिसांनी तेथे सापळा रचून त्याला बेड्या ठोकल्या.

मुख्य आरोपीवर २० पेक्षा जास्त गंभीर गुन्हे:
टोळीचा मुख्य म्होरक्या अमजद पठाण हा अत्यंत सराईत गुन्हेगार असून त्याच्यावर महाराष्ट्र, राजस्थान आणि मध्य प्रदेशात खून, अमली पदार्थ तस्करी आणि 'मोक्का' (MCOCA) अंतर्गत तब्बल २० गंभीर गुन्हे दाखल आहेत. कल्याण न्यायालयाने त्याला १ जूनपर्यंत पोलीस कोठडी सुनावली असून, या रॅकेटचे आंतरराष्ट्रीय संबंध असण्याची शक्यता पोलीस उपायुक्तांनी व्यक्त केली आहे.