मुंबई: 'खिशात ५० ग्रॅम पावडर टाकेन...'; आंदोलक विद्यार्थ्यांना पोलिसाकडून खोट्या गुन्ह्यात अडकवण्याची धमकी, व्हिडिओ व्हायरल!

मुंबई: दिल्लीतील जंतरमंतर येथे सुरू असलेल्या आंदोलनाला पाठिंबा आणि २० जुलै रोजी झालेल्या पोलिस कारवाईच्या निषेधार्थ बुधवारी मुंबईतही तरुणाई मोठ्या प्रमाणावर रस्त्यावर उतरली. मुसळधार पावसाची पर्वा न करता दादर येथील शिवाजी पार्क आणि चेंबूर येथील डॉ. बाबासाहेब आंबेडकर उद्यान परिसरात शेकडो विद्यार्थी, तरुण आणि विविध सामाजिक संघटनांचे कार्यकर्ते एकत्र आले होते. हातात निषेधाचे फलक, गुलाबाची फुले आणि चॉकलेट घेऊन त्यांनी शांततापूर्ण आंदोलन करत केंद्र सरकार आणि पोलिस कारवाईविरोधात आवाज उठवला.

मात्र, जमावबंदीच्या आदेशानंतरही तरुणाई रस्त्यावर उतरल्याने पोलिसांची डोकेदुखी वाढली. अशातच आंदोलकांना वैताگलेल्या पोलिसांनी काही विद्यार्थ्यांना ताब्यात घेतल्यानंतर त्यांना खोट्या गुन्ह्यात अडकवण्याची आणि आयुष्य उद्ध्वस्त करण्याची धमकी दिल्याचा एक व्हिडिओ सोशल मीडियावर तुफान व्हायरल झाला आहे.

 

नेमका प्रकार काय?
व्हायरल झालेल्या व्हिडिओनुसार, मुंबई पोलिसांनी काही विद्यार्थ्या्मना ताब्यात घेऊन आपल्या पोलीस वाहनात बसवले होते. त्यानंतर समोरील सीटवर बसलेल्या एका पोलीस कर्मचाऱ्याने त्या विद्यार्थ्यांना दमदाटी करण्यास सुरुवात केली. विशेष म्हणजे, विद्यार्थ्यांनी आपल्या मोबाईलचा कॅमेरा सुरू करून हा सर्व प्रकार रेकॉर्ड केल्याचे पोलिसांच्या लक्षात आले नाही.

या व्हिडिओमध्ये पोलीस कर्मचारी म्हणताना दिसत आहे की, "परत जर या परिसरात दिसलात तर माझ्यासारखा बेकार माणूस नाही. नाहीतर मी खिशात ५०-५० ग्रॅम पावडर टाकेन, मग जामीनही मिळणार नाही. तुम्हा लोकांमुळे सध्या आम्हाला त्रास होत आहे."

राजकीय वर्तुळात संताप आणि तीव्र पडसाद
पोलिसांकडून आंदोलक विद्यार्थ्यांना थेट खोट्या ड्रग्ज प्रकरणात अडकवण्याची आणि आयुष्य उद्धवस्त करण्याची धमकी दिल्याचा हा व्हिडिओ समोर आल्यानंतर राजकीय वर्तुळातून तीव्र संताप व्यक्त केला जात आहे. महाविकास आघाडीच्या विविध नेत्यांनी आणि विरोधकांनी या प्रकारावरून पोलीस प्रशासन व सरकारवर कडाडून टीका केली आहे. हा केवळ विद्यार्थ्यांना घाबरवण्याचा प्रयत्न नसून लोकशाही अधिकारांवर थेट हल्ला असल्याचे सांगत विरोधकांनी या कृत्याचा निषेध केला आहे. दरम्यान, या प्रकरणाचे गांभीर्य लक्षात घेता मुंबई पोलिसांनी व्हायरल व्हिडिओची सत्यता आणि त्यामागील परिस्थितीची चौकशी करण्याचे आदेश दिले आहेत. चौकशी अहवाल समोर आल्यानंतरच यावर अधिकृत कारवाई स्पष्ट होईल.