भोंदूगिरीचा पर्दाफाश! अघोरी पूजा आणि मृत्यूची भीती दाखवून 'भोंदू कमलेश'ने राज्यभरातील भाविकांना लुटले; पोलिसांची दोन पथके रवाना!

नाशिक: अघोरी पूजा, पितृदोष निवारण, तंत्रविद्या आणि कुटुंबातील व्यक्तींच्या मृत्यूची भीती दाखवून नागरिकांची लाखो रुपयांची फसवणूक करणाऱ्या एका हायप्रोफाइल भोंदूबाबाचा पोलिसांनी पर्दाफाश केला आहे. कमलेश उर्फ शिवकुमार अधिकारी असे अटक करण्यात आलेल्या या भोंदूबाबाचे नाव असून त्याच्या फसवणुकीचे नवे आणि धक्कादायक धागेदोरे पोलीस तपासात समोर येत आहेत.

राज्यभर वास्तव्य बदलून घातला गंडा

मूळचा पुण्याचा रहिवासी असलेला भोंदू कमलेश हा अत्यंत शातीर गुन्हेगार आहे. त्याने केवळ एकाच शहरात न थांबता त्र्यंबकेश्वर, नागपूर, सोलापूर आणि पुणे या विविध शहरांमध्ये सातत्याने आपले वास्तव्य बदलले. प्रत्येक ठिकाणी नवीन ओळख निर्माण करून त्याने शेकडो अंधश्रद्धाळू भाविकांना आपल्या जाळ्यात ओढले आणि त्यांना आर्थिक गंडा घातला.

विमानाने कोलकाता येथे नेऊन अघोरी पूजा!

तक्रारदारांनी पोलिसांना दिलेल्या माहितीनुसार, कमलेश हा लोकांच्या अगतिकतेचा गैरफायदा घ्यायचा. काही पीडित महिला आणि त्यांच्या कुटुंबीयांना त्याने थेट विमानाने कोलकाता येथे नेले होते. तिथे महाकाली देवीच्या नावाखाली अघोरी पूजा आणि तंत्र-मंत्राचे विधी करून त्यांच्याकडून मोठी रक्कम उकळल्याचे तपासात निष्पन्न झाले आहे.

धार्मिक स्थळांचा गैरवापर आणि प्रॉपर्टीवर डोळा

भोंदू कमलेशच्या फसवणुकीची पद्धत (Modus Operandi) अत्यंत नियोजनबद्ध होती. तो भाविकांना मंतरलेल्या पाण्याने आंघोळ घालणे, पितृदोष निवारण करणे आणि विशेष पूजा करण्यासाठी उज्जैन, त्र्यंबकेश्वर आणि नाशिकमधील गोदाघाट अशा प्रसिद्ध धार्मिक स्थळांवर घेऊन जायचा. या दौऱ्यांदरम्यान तो भाविकांशी अतिशय गोड बोलून त्यांच्या कौटुंबिक अडचणी आणि मुख्य म्हणजे त्यांच्या मालमत्तेची (Property) इत्थंभूत माहिती काढून घ्यायचा. एकदा का मालमत्तेचा अंदाज आला, की तो फसवणुकीचा मोठा सापळा रचायचा.

भोंदूची पत्नी फरार; पोलिसांची पथके रवाना

या गंभीर गुन्ह्यात भोंदू कमलेशला अटक करण्यात आली असली, तरी त्याची पत्नी पोलिसांना गुंगारा देऊन फरार झाली आहे. या गुन्ह्यात तिचाही सक्रिय सहभाग असल्याचा पोलिसांना संशय आहे. फरार पत्नीचा आणि या रॅकेटमधील इतर साथीदारांचा शोध घेण्यासाठी नाशिक पोलिसांनी दोन विशेष पथके वेगवेगळ्या राज्यांत आणि शहरांत रवाना केली आहेत. या भोंदूबाबाला आणखी किती लोकांनी पैसे दिले आहेत, याचा शोध आता पोलीस घेत आहेत.