मुंबई: रायगडमध्ये उभारणार १ हजार मेगावॅटचा पॉवर प्रोजेक्ट; ऐन गर्दीच्या वेळी मिळणार अखंडित वीज

मुंबई: टाटा पॉवरने ऊर्जेच्या क्षेत्रात एक मोठा टप्पा गाठत रायगड जिल्ह्यातील कर्जत परिसरातील भिवपुरी येथे १ हजार मेगावॅट क्षमतेचा 'पंपड् स्टोरेज पॉवर' (Pumped Hydro Storage) प्रकल्प उभारण्याच्या दिशेने मोठी मजल मारली आहे. हा महत्त्वाकांक्षी प्रकल्प ई-रिव्हर्स लिलाव प्रक्रियेद्वारे मिळविण्यात आला असून, याद्वारे वीज पुरवठ्याचे जाळे अधिक मजबूत होणार आहे.

सोलर एनर्जी कॉर्पोरेशन ऑफ इंडिया लिमिटेडकडून (SECI) या प्रकल्पांतर्गत वीज पुरवठा करण्यासाठी लेटर ऑफ अवॉर्ड प्राप्त झाले आहे. या प्रकल्पासाठी तब्बल ४० वर्षांचा पंप्ड स्टोरेज पॉवर खरेदी करार (PSPA) करण्यात आला असून, हा प्रकल्प 'बिल्ड, ओन, ऑपरेट' (BOO) तत्त्वावर विकसित केला जात आहे.

रायगड जिल्ह्यातील भिवपुरी येथे उभारला जाणारा हा प्रकल्प टाटा पॉवरच्या २,८०० मेगावॅटच्या मोठ्या पंप्ड हायड्रो स्टोरेज उपक्रमाचा एक महत्त्वाचा भाग आहे (ज्यामध्ये पुणे जिल्ह्यातील १८०० मेगावॅटचा शिरवटा प्रकल्पही समाविष्ट आहे). या प्रकल्पाद्वारे सुमारे आठ तास ऊर्जेची साठवणूक (Energy Storage) केली जाणार असून, ऐन विजेच्या मागणीच्या वेळी (पीक अवर्स) खंडित न होणारी अखंडित वीज उपलब्ध होण्यास मदत होणार आहे. अक्षय ऊर्जेच्या स्रोतांसोबत वीज ग्रीड स्थिर ठेवण्यासाठी आणि देशाच्या स्वच्छ ऊर्जा संक्रमणाला गती देण्यासाठी हा प्रकल्प अत्यंत महत्त्वाचा ठरणार आहे.