केरळ: देवदूत ठरल्या दोन परिचारिका! ट्राफिकमध्ये अडकलेल्या चालकाला आला हार्ट अटॅक, धावत्या एसटीतून उडी मारून वाचवले प्राण

केरळ: एर्नाकुलम जिल्ह्यात एका ४३ वर्षीय कार चालकाचे प्राण वाचवण्यासाठी दोन परिचारिकांनी दाखवलेली तत्परता सध्या कौतुकाचा विषय ठरत आहे. वाहतूक कोंडीत अडकलेल्या या चालकाला हृदयविकाराचा झटका आला असताना, धावत्या बसमधून उतरून या परिचारिकांनी त्याला सीपीआर (CPR) देऊन जीवनदान दिले.

नेमके काय घडले?
बुधवारी सकाळी कलाडी पुलाजवळील एमसी रोडवर ही घटना घडली. ओक्कलजवळील थन्नीपुझा येथे राहणारे सिनोज हे स्वतः गाडी चालवून रुग्णालयात जात असताना त्यांना छातीत तीव्र वेदना होऊ लागल्या. वाहतूक कोंडीमुळे गाडी रस्त्यातच अडकली होती आणि वेदनेमुळे ते गाडीतच कोसळले.

परिचारिकांची तत्परता:
रस्त्याच्या कडेला सुरू असलेली गडबड बसमधून प्रवास करत असलेल्या दोन परिचारिकांच्या लक्षात आली. अंगमाली येथील एलएफ हॉस्पिटलमधील स्टाफ नर्स अंजली बायजू आणि बंगळुरु येथील नर्सिंगची विद्यार्थिनी आर्द्रा राज यांनी कसलाही विचार न करता चालत्या एसटी बसमधून खाली उडी मारली आणि कारकडे धाव घेतली. त्यांनी त्वरित सिनोज यांना सीपीआर देण्यास सुरुवात केली.

 

रुग्णालयात पोहोचण्यापर्यंत उपचार:
सिनोज यांना रुग्णालयात पोहोचवेपर्यंत या दोन्ही परिचारिकांनी कारमध्येच सीपीआर देणे सुरू ठेवले होते. यामुळे रुग्णालयात पोहोचण्यापर्यंत त्यांच्या प्रकृतीत सुधारणेची चिन्हे दिसू लागली. डॉक्टरांनी दिलेल्या माहितीनुसार, सिनोज यांची कोरोनरी आर्टरी बंद असल्याचे निदान झाले असून त्यांच्यावर तातडीने अँजिओप्लास्टी करण्यात आली.

नागरिकांचे सहकार्य:
या बचाव मोहिमेत स्थानिक नागरिकांचीही मोठी मदत झाली. एका वाटसरूने गाडी चालवण्याची जबाबदारी स्वीकारली, तर काहींनी ट्रॅफिकमधून गाडी काढण्यास मदत केली आणि रुग्णवाहिकेची व्यवस्था केली. या परिचारिकांच्या धैर्याचे आणि उपस्थितांच्या मदतीचे सर्वत्र कौतुक होत आहे. अनेकांच्या मते, या परिचारिकांनी वेळीच घेतलेल्या निर्णयामुळेच सिनोज यांचा जीव वाचला.