नागपुरात गुन्हेगारीचे सावट; महाल परिसरात गोळीबाराचा थरार, तर एमआयडीसीत ४ दिवसांत दोन अंगावर काटा आणणाऱ्या हत्या

नागपूर: उपराजधानी नागपूर शहरात पुन्हा एकदा गुन्हेगारीने डोके वर काढले असून कायदा व सुव्यवस्थेचा प्रश्न गंभीर बनला आहे. नागपूरच्या मध्यवर्ती भागात असलेल्या महाल येथील कोठीरोड परिसरात मध्यरात्री गोळीबाराची धक्कादायक घटना घडली आहे. तर दुसरीकडे, एमआयडीसी (MIDC) पोलीस ठाण्याच्या हद्दीत एकाच जागेवर अवघ्या चार दिवसांत दोघांची दगडाने ठेचून हत्या करण्यात आल्याने संपूर्ण नागपूर शहरात एकच खळबळ उडाली आहे. या दोन्ही घटनांमुळे नागरिकांमध्ये भीतीचे वातावरण निर्माण झाले आहे.

१. संघ मुख्यालयाजवळ मध्यरात्री गोळीबार!
रविवारी रात्री साडेअकरा ते बाराच्या सुमारास महालातील कोठीरोड परिसरात गोळीबार झाला. धक्कादायक बाब म्हणजे, हे घटनास्थळ राष्ट्रीय स्वयंसेवक संघाच्या (RSS) मुख्यालयापासून अवघ्या दीड किलोमीटर अंतरावर आहे. तीन दुचाकींवरून आलेल्या सहा जणांच्या टोळीने परिसरात दहशत माजवत दोनदा हवेत गोळीबार (फायरिंग) केला आणि पळ काढला.

सौरभ नावाच्या फिर्यादीने दिलेल्या माहितीनुसार, रवी मोहतो आणि गंगा काकडे नावाच्या गुन्हेगारांनी आपल्या साथीदारांसह परिसरात वर्चस्व व दहशत पसरवण्यासाठी हा गोळीबार केला. पोलिसांनी दिलेल्या प्राथमिक माहितीनुसार, संशयित आरोपी हे गुन्हेगारी पार्श्वभूमीचे असून त्यांच्यावर अमली पदार्थ (ड्रग्ज) बाळगणे आणि विक्री करण्याचे गुन्हे दाखल आहेत. त्यांच्यातील अंतर्गत वादातूनच हा गोळीबार झाल्याचे बोलले जात आहे. सध्या कोतवाली पोलीस या प्रकरणाचा सखोल तपास करत आहेत.

२. MIDC मध्ये एकाच ठिकाणी चार दिवसांत दोन हत्या!
नागपूरच्या एमआयडीसी पोलीस ठाण्याच्या हद्दीत असलेल्या माधवनागरी परिसरातील एकाच जागेवर चार दिवसांच्या अंतराने दोघांची दगडाने ठेचून निर्घृण हत्या करण्यात आली आहे.

पहिली घटना: गेल्या गुरुवारी याच ठिकाणी आकाश बरडे या तरुणाची अज्ञातांनी दगडाने ठेचून हत्या केली होती.

दुसरी घटना: ही घटना ताजी असतानाच, रविवारी रात्री ८ वाजताच्या सुमारास अंकुश शेंडे या मजुराची त्याच जागेवर अगदी तशाच पद्धतीने दगडाने डोके ठेचून हत्या करण्यात आली. अंकुश हा दारूच्या आहारी गेला होता, अशी माहिती समोर आली आहे.

हे दोन्ही मृतक एकाच इसासनी भागातील रहिवासी होते आणि दोन्ही हत्येचे घटनास्थळ देखील एकच आहे. जरी पोलीस या दोन्ही हत्यांचा एकमेकांशी थेट संबंध नसल्याचे सांगत असले, तरी एकाच जागेवर चार दिवसांत दोन जणांना संपवल्यामुळे परिसरात प्रचंड दहशत पसरली आहे. पोलीस दोन्ही प्रकरणांतील मारेकऱ्यांचा कसून शोध घेत आहेत.