नाशिकचा कायापालट! कुंभमेळ्याच्या निमित्ताने ११ हजार कोटींची विक्रमी गुंतवणूक; ३५ हजार तरुणांना मिळणार हक्काचा रोजगार

नाशिक: सिंहस्थ कुंभमेळ्याच्या पार्श्वभूमीवर नाशिकच्या औद्योगिक विकासाला मोठी गती मिळणार आहे. राज्याच्या उद्योग विभागाने नाशिकमध्ये तब्बल ११ हजार कोटींची गुंतवणूक आणली असून, त्यानिमित्ताने आयोजित 'कुंभ उद्योग संगम' आणि 'नाशिक डिस्ट्रिक्ट इन्व्हेस्टमेंट समिट'मध्ये आज (६ मे) मुख्यमंत्री देवेंद्र फडणवीस यांच्या उपस्थितीत २९४ सामंजस्य करार (MoUs) केले जाणार आहेत.

३५ हजार रोजगारांची मोठी संधी
या ऐतिहासिक गुंतवणुकीमुळे आगामी ५ वर्षांत नाशिकमध्ये विविध क्षेत्रांत एकूण ३५ हजार नवीन रोजगार निर्माण होणार आहेत. कुंभमेळ्याचा फायदा केवळ धार्मिक पर्यटनापुरता मर्यादित न राहता, उद्योग कायमस्वरूपी नाशिकमध्ये स्थिराववेत, या उद्देशाने जिल्हा प्रशासन आणि उद्योग विभागाने या प्रक्रियेची जय्यत तयारी केली आहे. उद्योग विकास आयुक्त दीपेंद्रसिंह कुशवाह यांनी माहिती दिली की, यापूर्वी झालेल्या १८ हजार कोटींच्या करारांनंतर आता कंपन्या जमिनी घेणे आणि परवानग्या मिळवण्याच्या टप्प्यावर आहेत, ज्याचे दृश्य परिणाम पुढील ३ ते ५ वर्षांत दिसतील.

महेंद्रची ५ हजार कोटींची ईव्ही झेप
नाशिकमधील ऑटोमोबाईल क्षेत्राचा कणा असलेल्या महेंद्र अँड महेंद्र कंपनीने ईव्ही (इलेक्ट्रिक व्हेईकल) कारचा प्लांट सुरू करण्यासाठी आडवण येथे ५ हजार कोटींची गुंतवणूक जाहीर केली आहे. यासोबतच लॉजिस्टिक सपोर्टही सुरू केला जाणार असून, यातून एकट्या महेंद्र समूहाकडून १० ते १२ हजार रोजगारांची निर्मिती होणार आहे.

संरक्षण क्षेत्रात जर्मन तंत्रज्ञानाचे आगमन
नाशिक आता 'डिफेन्स हब' म्हणूनही नावारूपास येत आहे. संरक्षण साहित्य उत्पादनातील जागतिक स्तरावरील आघाडीची जर्मन कंपनी 'बेर्निको वेगार्ड' नाशिकमध्ये ४ हजार कोटींची गुंतवणूक करण्यासाठी उत्सुक आहे. पहिल्या टप्प्यात १ हजार आणि टप्प्याटप्प्याने ३ हजार कोटींची गुंतवणूक करण्यासाठी मंगळवारी सायंकाळपर्यंत प्रशासनाशी प्राथमिक चर्चा पूर्ण झाली आहे. नाशिकचे मुंबई आणि वाढवण बंदराशी असलेले कमी अंतर, उत्तम हवामान आणि कुशल मनुष्यबळ यामुळे ही कंपनी येथे येण्यास तयार आहे.

सागरी सुरक्षा तंत्रज्ञानात क्रांती
बेर्निको वेगार्ड ही कंपनी हाय-स्पीड व्हिसल्स (वेगवान नौका), प्रगत प्रोपल्शन सिस्टिम्स आणि कमी वजनाच्या कंपोझिट इंजिनिअरिंगमध्ये निष्णात आहे. सीमा सुरक्षा, सागरी देखरेख आणि संरक्षण दलांसाठी लागणारी मानवरहित स्वयंचलित यंत्रणा (Autonomous Solutions) तयार करण्यात या कंपनीचा मोठा वाटा असून, यामुळे नाशिकच्या शिरपेचात मानाचा तुरा रोवला जाणार आहे.