तुकाराम मुंढेंच्या एफडीएचा पुण्यासह राज्यभरात धडाका! तब्बल २.२३ कोटींचा अन्नसाठा जप्त; २३ परवाने निलंबित, ७ जणांना अटक!

अन्न व औषध प्रशासन (FDA) विभागाचे आयुक्त तुकाराम मुंढे यांच्या निर्देशानुसार पुण्यासह संपूर्ण महाराष्ट्रभरात भेसळयुक्त अन्नपदार्थ, स्वच्छता व अन्न सुरक्षा नियमांचे उल्लंघन तसेच अनधिकृत विक्रीविरोधात मोठी कारवाई करण्यात आली आहे. या विशेष मोहिमेंतर्गत राज्यभरात तब्बल २.२३ कोटी रुपये किमतीचा अन्नसाठा जप्त करण्यात आला असून, २३ अन्न व्यवसाय परवाने निलंबित करण्यात आले आहेत. तसेच या कारवाईदरम्यान ७ जणांना अटक करण्यात आल्याची माहिती समोर आली आहे.

पुण्यातील खाऊ गल्ली आणि विविध भागांतील कारवाई:

पुण्यातील प्रसिद्ध खाऊ गल्ल्यांवर व अन्न आस्थापनांवर एफडीएच्या पथकांनी कडक पावले उचलली आहेत. जंगली महाराज रस्ता (जेएम रोड) खाऊ गल्ली परिसरातील तपासणीदरम्यान ८ विनानोंदणीकृत विक्रेत्यांचा व्यवसाय तात्काळ बंद करण्याचे आदेश देण्यात आले असून, त्यांच्यावर २.४० लाख रुपयांचा दंड आकारण्यात आला आहे. तसेच पुण्यातील कारवाईत १० परवाने निलंबित करण्यात आले आहेत. याशिवाय ठाणे, रायगड आणि पुण्यात चहा मिक्स, तूप, जेलीपॉप यांसारखा ६८,०९४ रुपये किमतीचा साठा जप्त करण्यात आला आहे. नियमांचे उल्लंघन करणाऱ्या आस्थापनांवर अन्न सुरक्षा व मानके कायदा, २००६ अंतर्गत कठोर कारवाई करण्याचा इशारा प्रशासनाने दिला आहे.

भिवंडीतील फेरछपाईचा प्रकार, पंढरपूर वारी तपासणी आणि प्रतिबंधित गुटख्यावर कारवाई:

राज्यभरातील मोहिमेत भिवंडीतील अन्नपदार्थांवरील मुदत दिनांक (Expiry Date) व एमआरपी (MRP) थिनरने खोडून त्यावर फेरछपाई करण्याचा गंभीर प्रकार उघडकीस आला आहे. कार्तिकी वारीच्या पार्श्वभूमीवर पंढरपुरात ५४ आस्थापनांची तपासणी करण्यात आली असून, दोषी आस्थापनांचे परवाने निलंबित करण्यात आले आहेत. मुंबईत ६, तर नागपूर, नाशिक आणि छत्रपती संभाजीनगर विभागातही परवाने निलंबनाची कारवाई करण्यात आली आहे. कोकण व नाशिक विभागात ६ आस्थापनांचे परवाने निलंबित झाले आहेत. दरम्यान, प्रतिबंधित गुटखा व पान मसाल्याविरोधात राबविलेल्या मोहिमेत १६.४२ लाख रुपयांपेक्षा अधिक किमतीचा साठा जप्त करून ४ एफआयआर (FIR) दाखल करण्यात आल्या असून ७ जणांना अटक करण्यात आली आहे.

 



शहर

महाराष्ट्र

राजकीय

विडियो गॅलेरी

Leave a Reply

Your email address will not be published. Required fields are marked *