अन्न व औषध प्रशासनाचा मुंबईत मोठा बडगा; प्रसिद्ध 'सुलेमान मिठाईवाला'सह १० आस्थापनांचे परवाने गंभीर त्रुटींमुळे निलंबित!

मुंबई : सणासुदीच्या पार्श्वभूमीवर अन्नपदार्थांची सुरक्षितता, उच्च गुणवत्ता आणि आरोग्याची मानके काटेकोरपणे सुनिश्चित करण्यासाठी अन्न व औषध प्रशासनाने (FDA) मुंबईत मोठी धडक तपासणी मोहीम राबवली आहे. या कठोर मोहिमेदरम्यान अन्नसुरक्षा नियमांचे उल्लंघन, गंभीर स्वच्छता त्रुटी आणि अन्न साठवणुकीतील मोठ्या अनियमितता आढळल्यामुळे मुंबईतील तब्बल १० प्रमुख खाद्य आस्थापनांचे परवाने किंवा नोंदणी प्रमाणपत्रे तात्काळ प्रभावाने निलंबित करण्यात आली आहेत.

प्रसिद्ध 'सुलेमान मिठाईवाला'च्या परवान्यावर टाच दक्षिण मुंबईतील मोहम्मद अली रोड येथील अत्यंत प्रसिद्ध आणि जवळपास ९० वर्षे जुने प्रतिष्ठित मिठाईचे दुकान असलेल्या ‘सुलेमान उस्मान मिठाईवाला’ (Suleman Usman Mithaiwala) यांच्या खाद्य परवान्यावर प्रशासनाने धडक कारवाई केली आहे. तपासणीदरम्यान या दुकानात अन्न तयार करण्याची जागा आणि कचरा साठवण्याची किंवा सांडपाण्याची ठिकाणे यामध्ये योग्य ते अंतर किंवा अलगाव (Inadequate separation) नसल्याचे उघडकीस आले. तसेच उघड्या नाल्यांवर कॉकरोच ट्रॅप्स नसणे, मिठाई अयोग्य तापमानावर आणि अस्वच्छ वातावरणात साठवणे यांसारख्या गंभीर त्रुटींमुळे ग्राहकांच्या आरोग्याशी थेट खेळ होत असल्याचे स्पष्ट झाल्याने अन्न सुरक्षा आणि मानके कायद्यांतर्गत (FSS Act) ही मोठी कारवाई करण्यात आली आहे.

इतर प्रमुख आस्थापनांवरही कठोर प्रशासकीय कारवाई फक्त सुलेमान मिठाईवालाच नव्हे, तर मुंबईतील इतरही अनेक नामवंत हॉटेल्स, स्वीट मार्ट्स, रेस्टॉरंट्स आणि डार्क स्टोअर्सवर प्रशासनाने कारवाईचा बडगा उगारला आहे.

• बॅलार्ड इस्टेट येथील स्विगी इन्स्टामार्ट (Swiggy Instamart Dark Store): येथे तपासणीदरम्यान अन्न हाताळणी क्षेत्रात जिवंत उंदीर (Live rat), कुडतडलेले तांदळाचे पोती, उंदराची विष्ठा, खाद्यपदार्थांवर कॉकरोच आणि रेफ्रिजरेटर युनिट्समध्ये घाण व कीटक आढळल्याने तात्काळ परवाना निलंबित करण्यात आला.

• मालाड पूर्वेकडील सद्गुरू स्वीट्स अँड फरसाण मार्ट: येथे तयार मिठाईवर माशा घुटमळत असल्याचे, तसेच उत्पादन व विक्री क्षेत्रात योग्य अलगाव नसून खरेदीचे रेकॉर्ड आणि प्रयोगशाळा अहवाल उपलब्ध नसल्याचे आढळले.

• याशिवाय इतरही काही नामांकित खाणावळी, हॉटेल्स आणि डेअरींवर प्रशासनाकडून दंडात्मक व निलंबनाची कारवाई करण्यात आली आहे.

एफडीए आयुक्त तुकाराम मुंढे यांचा धडाका अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली सुरू असलेल्या या राज्यव्यापी आणि कठोर मोहिमेमुळे संपूर्ण अन्न व्यवसायात मोठी खळबळ उडाली आहे. सणासुदीच्या काळात नागरिकांच्या आरोग्याला धोका निर्माण करणारे निकृष्ट दर्जाचे, भेसळयुक्त किंवा अस्वच्छ अन्नाची विक्री करणाऱ्यांवर कसलीही दयेची भावना न दाखवता कठोर कायदेशीर कारवाई केली जात आहे. प्रशासनाच्या या धडक कारवाईमुळे हॉटेल्स आणि मिठाई व्यावसायिकांचे धाबे दाणणले असून स्वच्छतेच्या नियमांचे तंतोतंत पालन करण्याचे सक्त निर्देश देण्यात आले आहेत.

•