सिद्धेश्वर एक्सप्रेसमध्ये दरोड्याचा डाव उधळला; RPF पथकाची सतर्कता, ९ महिला गुन्हेगारांना बेड्या

सोलापूर/मुंबई:
मध्य रेल्वेच्या रेल्वे सुरक्षा दलाने (RPF) अत्यंत फिल्मी स्टाईलने पाठलाग करत सिद्धेश्वर एक्सप्रेसमधील दरोड्याचा मोठा कट उधळून लावला आहे. या प्रकरणी पोलिसांनी सोलापूर रेल्वे स्थानकावर ९ महिला गुन्हेगारांना ताब्यात घेतले असून त्यांच्यावर गुन्हा दाखल करण्यात आला आहे.

नेमकी घटना काय?
२२ एप्रिल रोजी कुर्डुवाडी रेल्वे स्थानकावर गस्त घालत असताना 'गुन्हे प्रतिबंध व शोध पथकाचे' (CPDS) हेड कॉन्स्टेबल शिवाजी मुंडे यांना तीन महिला संशयास्पद रितीने फिरताना दिसल्या. पोलिसांनी त्यांची प्राथमिक चौकशी करून त्यांना सोडून दिले, मात्र त्यांच्या हालचालींवर बारीक लक्ष ठेवले. या महिला लातूर एक्सप्रेसमध्ये चढल्याचे पाहिल्यानंतर आरपीएफने सोलापूर मार्गावर 'हाय अलर्ट' जारी केला.

असा उधळला डाव:
संशयित महिला आरोपी जेऊर स्थानकावर उतरल्या आणि तिथून दरोडा टाकण्याच्या उद्देशाने १२११५ सिद्धेश्वर एक्सप्रेसमध्ये चढल्या. मात्र, आरपीएफचे पथक आधीच सावध होते. हेड कॉन्स्टेबल हरमेंद्र प्रसाद मीना आणि कॉन्स्टेबल ब्रजेश यादव यांच्या पथकाने प्रवाशांच्या मदतीने आणि फोटोंच्या आधारे या महिलांवर सतत पाळत ठेवली.

सोलापूर स्थानकावर अटक:
सिद्धेश्वर एक्सप्रेस सोलापूर स्थानकावर पोहोचताच, लेडी कॉन्स्टेबल सोनम पठाण यांच्यासह आरपीएफच्या पथकाने सापळा रचून सर्व ९ महिलांना ताब्यात घेतले. या महिला १८ ते ४० वयोगटातील असून त्या धाराशिव (उस्मानाबाद) जिल्हयातील रहिवासी आहेत.

पुढील तपास सुरू:
अटक करण्यात आलेल्या महिलांविरुद्ध भारतीय न्याय संहिता (BNS) २०२३ च्या कलम ३१०(४) (दरोड्याची तयारी) अंतर्गत कुर्डुवाडी जीआरपीमध्ये गुन्हा दाखल करण्यात आला आहे. ही टोळी सोलापूर आणि पुणे या दोन्ही विभागांत सक्रिय असल्याची माहिती समोर आली आहे. या कारवाईमुळे रेल्वे प्रवाशांच्या सुरक्षेचा प्रश्न पुन्हा एकदा अधोरेखित झाला असून आरपीएफच्या कामगिरीचे कौतुक होत आहे. प्रवाशांनी सतर्क राहावे आणि काहीही संशयास्पद आढळल्यास १३९ वर संपर्क साधावा, असे आवाहन रेल्वे प्रशासनाने केले आहे.