छत्रपती संभाजीनगर: लग्नाचा प्रस्ताव नाकारल्याच्या रागातून मेडिकल दुकानात घुसून २२ वर्षीय केमिस्टची निर्घृण हत्या, पोलिसांनी अवघ्या ९ तासांत आवळल्या आवडी

छत्रपती संभाजीनगर: लग्नाचा प्रस्ताव नाकारल्याच्या रागातून व पूर्ववैमनस्यातून एका तरुणाची त्याच्याच मेडिकलमध्ये शिरून पोटात धारदार चाकू भोसकून हत्या करण्यात आली. हर्मूलच्या कोलठाणवाडी रस्त्यावर शुक्रवारी दुपारी हा थरार घडला. शेख मोहम्मद फैसल अब्दुल कादर (वय २२, रा. उमर कॉलनी, हसूल) असे मृताचे नाव आहे. हर्सल पोलिसांनी मुख्य आरोपी रेहान अमीन पटेल (२५, रा. करीमनगर, हसूल) आणि त्याचा साथीदार समीर रईस शेख (२२, रा. हर्सल) या दोघांना सावंगी फुलंब्री परिसरातून ९ तासांत अटक केली.

फैसलने हर्सलच्या करीमनगरमध्ये औषधी दुकान सुरू केले होते. फैसलचे मोठे भाऊ शेख मुस्ताकीम यांच्या तक्रारीनुसार, सहा महिन्यांपूर्वी मुख्य आरोपी रेहानसाठी त्याच्या कुटुंबाने फैसलच्या धाकट्या बहिणीसाठी लग्नाचा प्रस्ताव ठेवला होता. मात्र, तिचे लग्न आधीच दुसरीकडे ठरल्याने फैसलच्या कुटुंबाने नकार कळवला. गुंड प्रवृत्तीच्या रेहानने हा राग मनात धरला होता. रेहान सतत फैसल, त्याच्या कुटुंबाला त्रास देत होता. त्यांच्या घर, दुकानासमोरून मोठ्या आवाजात बुलेट पळवणे, आरडाओरड करून हुज्जत घालणे, रस्त्यात खुन्नस देणे, इशारे करून धमक्या देत होता.

तीन दिवसांपूर्वी मेडिकल पेटवले, अन् शुक्रवारी थेट जीव घेतला
रेहान इंटरनेट केबल ऑपरेटर म्हणून काम करतो. सुशिक्षित कुटुंबातील असूनही रेहान नशेखोर, गुंड प्रवृत्तीच्या तरुणांच्या संगतीत राहत होता. तीन दिवसांपूर्वीच त्याने फैसलचे दुकान जाळले होते, असा फैसलला संशय होता. शुक्रवारी फैसल दुकान उघडून शांतपणे कुराण पठण करत बसला होता. दुपारी १ वाजता रेहान, समीरने मेडिकलमध्ये घुसून फैसलला मारहाण करत दुकानाबाहेर ओढले. रेहानने धारदार चाकू फैसलच्या पोटात खोलवर भोसकला. वार इतका भीषण होता की, चाकू पोटातच सोडून आरोपी पसार झाले. मेडिकलसमोरच पोलिसांना चाकूचे पाकीटही सापडले.

'माझ्या निष्पाप मुलासोबत इतके अमानुष कृत्य का?'
घटनेनंतर स्थानिकांनी जखमी फैसलला घाटी रुग्णालयात नेले. मात्र, चाकू खोलवर घुसल्याने त्याचा मृत्यू झाला होता. कुटुंबातील हुशार, समंजस आणि जबाबदार मुलगा गमावल्याने नातेवाईकांनी टाहो फोडला. 'हमारे नेक बच्चे के साथ ऐसा सलूक क्यू ? सभी दोषी को गिरफ्तार करो', असा आक्रोश करत संताप व्यक्त केला. फैसलच्या पश्चात आई, वडील, दोन बहिणी, भाऊ असा परिवार आहे.

जिल्हाभर फिरले, रात्रीपर्यंत अटक
पोलिस उपायुक्त रत्नाकर नवले, सहायक आयुक्त मनोज पगारे, हर्सलच्या निरीक्षक स्वाती केदार, सहायक निरीक्षक सचिन सदाफुले यांनी घटनास्थळी धाव घेतली. सहायक फौजदार सुभाष शेवाळे, अंमलदार फिरोज तडवी, मोहन सिंगल, आकाश जायभाय, अश्विनी गाडेकर यांनी कच्ची घाटी, पीरवाडी, रसूलपुऱ्यासह खुलताबादेत आरोपींचा शोध घेतला. हत्येनंतर मारेकरी जिल्ह्याबाहेर पळण्याच्या प्रयत्नात होते. पोलिसांनी रात्रीपर्यंत रेहान आणि समीरला सावंगी फुलंब्री परिसरातून मुसक्या आवळल्या. मृत फैसलच्या भावाच्या तक्रारीवरून हसूल ठाण्यात गुन्हा दाखल करण्यात आला.