पुणे महापालिकेशी विसंगती भोवली! कोणतीही परवानगी न घेता शाळा स्थलांतरित केल्याप्रकरणी सिंहगड एज्युकेशन सोसायटीच्या संस्थापकांवर फसवणुकीचा गुन्हा दाखल!

पुणे: पुण्यातील नामांकित संस्थांपैकी एक असलेल्या सिंहगड टेक्निकल एज्युकेशन सोसायटीच्या व्यवस्थापनाकडून एक मोठा नियमांचा व कायद्याचा भंग केल्याचे समोर आले आहे. कोंढवा बुद्रुक येथील सिंहगड सिटी स्कूल (Sinhgad City School) कोणतीही कायदेशीर किंवा शासकीय परवानगी न घेताच अन्यत्र स्थलांतरित केल्याप्रकरणी संस्थेच्या व्यवस्थापनावर आणि संस्थापकांवर कठोर कायदेशीर कारवाई करण्यात आली आहे. विशेष म्हणजे, पुणे महानगरपालिकेने (PMC) स्पष्ट निर्देश देऊनही महापालिकेच्या आदेशाला चक्क केराची टोपली दाखवत मनमानी कारभार सुरू ठेवल्याने शिक्षण वर्तुळात एकच खळबळ उडाली आहे.

महापालिकेच्या आदेशांना स्पष्ट टाळाटाळ: मिळालेल्या सविस्तर माहितीनुसार, सिंहगड टेक्निकल एज्युकेशन सोसायटीतर्फे चालविण्यात येणारी सिंहगड सिटी स्कूलची अधिकृत परवानगी नसतानाही अनधिकृतपणे शाळा हलविण्यात आल्याचा प्रकार उघडकीस आला होता. त्यानंतर पुणे महापालिकेच्या प्राथमिक शिक्षण विभागाच्या प्रशासकीय अधिकाऱ्यांनी १२ फेब्रुवारी २०२६ रोजी संस्थेला अधिकृत पत्र पाठवून कडक निर्देश दिले होते. शाळेचे स्थलांतर करू नये तसेच मूळ मंजूर ठिकाणीच शाळा सुरू ठेवावी, शिवाय शाळेत कोणत्याही नवीन विद्यार्थ्यांना प्रवेश देऊ नये, असे स्पष्टपणे बजावण्यात आले होते. परंतु, महापालिकेच्या या आदेशाचे व निर्देशांचे पद्धतशीरपणे उल्लंघन करण्यात आले.

पालकांची दिशाभूल करून नवीन प्रवेश व गुन्हा दाखल: महापालिकेने नवीन प्रवेशास स्पष्ट बंदी घातली असतानाही, शैक्षणिक वर्ष २०२६-२७ मध्ये सदर शाळेच्या माध्यमातून पहिलीच्या वर्गात तब्बल ६२ विद्यार्थ्यांना बेकायदेशीरपणे नव्याने प्रवेश देण्यात आले. विशेष बाब म्हणजे, शाळेचे स्थलांतर करण्यास कोणतीही शासकीय परवानगी नाही आणि महापालिकेने नवीन प्रवेशास मज्जाव केला आहे, ही अत्यंत महत्त्वाची वस्तुस्थिती पालकांपासून जाणीवपूर्वक लपवून ठेवली गेली. पालकांची मोठी दिशाभूल करून अशा प्रकारे विद्यार्थ्यांना प्रवेश दिल्याचे निष्पन्न झाले आहे.

या संपूर्ण गंभीर प्रकाराची दखल घेत महापालिकेच्या शिक्षण विभागाने पोलिस प्रशासनाकडे धाव घेतली. त्यानुसार, कोंढवा बुद्रुक पोलिसांनी फसवणूक आणि दिशाभूल केल्याप्रकरणी सिंहगड एज्युकेशन सोसायटीचे संस्थापक मारुती नवले आणि सुनंदा नवले यांच्याविरोधात फसवणुकीचा (Fraud Case) गुन्हा दाखल केला आहे. या प्रकरणाचा पुढील सखोल तपास सहायक पोलिस निरीक्षक अश्विनी पाटील यांच्यामार्फत सुरू असून, या प्रकरणामुळे शहरात मोठी चर्चा रंगली आहे.