सांगली: चालकाला अचानक चक्कर आल्याने एसटी बस थेट चहाच्या टपरीवर धडकली; टळला मोठा अनर्थ, सर्व प्रवासी सुखरूप

सांगली:एक अत्यंत धक्कादायक आणि थरारक घटना समोर आली आहे. सांगलीच्या ईश्वरपूर रोडवरील तुंग परिसरात प्रवाशांनी भरलेली एसटी बस चालवत असताना चालकाला अचानक चक्कर आल्यामुळे भीषण अपघात घडला. चालकाचे बसवरील नियंत्रण पूर्णपणे सुटल्याने ही बस रस्त्यावरील डिव्हायडरवर चढून थेट रस्त्यालगत असलेल्या एका चहाच्या टपरीवर जाऊन जोरदार धडकली. या अपघातात एसटी बसचा पुढील भाग आणि चहाच्या टपरीचे मोठे नुकसान झाले आहे. मात्र, सुदैवाने या अपघातात कोणतीही जीवितहानी झाली नसून बसमधील सर्व प्रवासी आणि नागरिक पूर्णपणे सुखरूप आहेत. या घटनेमुळे परिसरात काही वेळ मोठी धावपळ उडाली होती.

नेमक काय घडले? मिळालेल्या माहितीनुसार, शिराळा आगाराची एसटी बस नेहमीप्रमाणे प्रवाशांना घेऊन ईश्वरपूर मार्गावरून जात होती. बस तुंग परिसराजवळ पोहोचली असताना, अचानक एसटी चालकाला अस्वस्थ वाटू लागले आणि त्याला तीव्र चक्कर आली. चालकाला चक्कर आल्यामुळे बसवरील त्याचे नियंत्रण सुटले. बस वेगात असल्याने ती आधी रस्त्यावरील डिव्हायडरवर चढली आणि त्यानंतर थेट रस्त्याच्या कडेला असलेल्या चहाच्या टपरीवर जाऊन धडकली. बसमधील प्रवाशांना नेमके काय घडत आहे, हे समजण्याच्या आतच हा अपघात घडल्याने प्रवाशांच्या छातीचा ठोका चुकला होता.

 

 

मोठा अनर्थ टळला: ज्या वेळी हा अपघात घडला, त्यावेळी रस्त्यावर आणि चहाच्या टपरीजवळ लोकांची वर्दळ तुलनेने कमी होती. त्यामुळे मोठी जीवितहानी टळली. अपघात झाल्यानंतर तातडीने आजूबाजूच्या परिसरातील नागरिकांनी घटनास्थळी धाव घेतली. बसमधील सर्व प्रवाशांना सुखरूपपणे खाली उतरवण्यात आले. तसेच चक्कर आलेल्या एसटी चालकालाही बसमधून बाहेर काढून त्याला त्वरित प्रथमोचारासह वैद्यकीय मदत देण्यात आली. घटनेची माहिती मिळताच पोलिसांनी तात्काळ घटनास्थळी धाव घेत वाहतूक सुरळीत केली. चालकाच्या प्रसंगावधानामुळे आणि सुदैवाने मोठा अनर्थ टळल्याने सर्वांनीच सुटकेचा श्वास सोडला आहे.