मुंबई हादरली! मित्राच्या आईशी चॅटिंग करणे पडले महागात; भांडुपमध्ये तरुणावर कोयत्याने प्राणघातक हल्ला

भांडुप (मुंबई): मुंबईच्या भांडुप परिसरातून एक अतिशय धक्कादायक घटना समोर आली आहे. सोशल मीडियावरील चॅटिंग आणि आईशी फोनवर बोलण्याच्या कारणावरून एका अल्पवयीन मुलाने आपल्या मित्रावर कोयत्याने प्राणघातक हल्ला केल्याचा प्रकार उघडकीस आला आहे. या हिंसक घटनेमुळे भांडुप परिसरात मोठी खळबळ उडाली आहे.

नेमकी घटना काय?
जखमी तरुणाचे नाव 'रोहित संजय झनके' असे आहे. रोहित आणि हल्ला करणारा अल्पवयीन मुलगा हे दोघेही भांडुपमधील रहिवासी असून त्यांची गेल्या पाच वर्षांपासून मैत्री होती. दोघांच्याही घरी येण्या-जाण्याचे संबंध होते. दरम्यान, रोहितकडे आरोपीच्या आईचा मोबाईल नंबर होता. रोहित तिच्याशी वारंवार फोनवर बोलत असे आणि चॅटिंगही करत असे, ही बाब जेव्हा आरोपी मुलाला समजली, तेव्हा तो प्रचंड संतापला.

आरोपीचा हिंसक पवित्रा:
ही गोष्ट समजल्यानंतर आरोपी मुलाने सुरुवातीला रोहितला धमकी दिली होती. इतकेच नव्हे तर, याच कारणावरून त्याने स्वतःच्या आईलाही मारहाण केली होती. या प्रकारामुळे परिसरात तणावाचे वातावरण निर्माण झाले होते.

प्राणघातक हल्ला:
रविवारी, २४ मे रोजी रोहित एम.डी. केणी मार्गावरून जात असताना आरोपी तिथे पोहोचला. दोघांमध्ये जोरदार वाद झाला आणि रागाच्या भरात आरोपीने जवळ असलेल्या कोयत्याने रोहितवर सपासप वार केले. या हल्ल्यात रोहित गंभीर जखमी झाला असून, त्याला तातडीने सायन रुग्णालयात उपचारासाठी दाखल करण्यात आले आहे.

पोलिसांची कारवाई:
ही घटना समजताच स्थानिकांनी कांजूरमार्ग पोलिसांना याची माहिती दिली. पोलिसांनी जखमी रोहितचा जबाब नोंदवून घेत आरोपी मुलावर गुन्हा दाखल केला आहे. अल्पवयीन आरोपी फरार झाला होता, परंतु पोलिसांनी तत्परता दाखवत त्याला ताब्यात घेतले आहे. आरोपी अल्पवयीन असल्याने त्याला डोंगरी येथील बालसुधारगृहात पाठवण्यात आले आहे.