“आजी जरा बाजूला व्हा...” एका शब्दाने घात केला! कल्याण स्टेशन परिसरात ७५ वर्षीय वृद्धेची १.२० लाखांची सोन्याची बांगडी लंपास

कल्याण स्टेशन परिसरात धक्कातंत्राचा वापर करून ७५ वर्षीय आजींची सोन्याची बांगडी चोरीला; २५ वर्षांची कौटुंबिक आठवण हिरावल्याने हळहळकल्याण रेल्वे स्थानक आणि बस आगार परिसरात सुट्ट्यांच्या हंगामात भुरट्या चोरांनी अक्षरशः धुमाकूळ घातला आहे. भरदिवसा गर्दीचा फायदा घेत एका ७५ वर्षांच्या वृद्ध महिलेच्या हातातील सोन्याची बांगडी चोरट्याने अत्यंत चलाखीने आणि काही सेकंदांत लंपास केल्याची धक्कादायक घटना समोर आली आहे. या प्रकरणी पीडित वृद्ध महिलेच्या तक्रारीनंतर महात्मा फुले पोलीस ठाण्यात अज्ञात चोरट्याविरुद्ध गुन्हा दाखल करण्यात आला आहे. "आजी, जरा बाजूला व्हा..." आणि घात झाला:मिळालेल्या माहितीनुसार, नलिनी प्रताप शहा (वय ७५ वर्षे) असे या दुर्दैवी आजींचे नाव आहे. त्या कल्याणमधील मुरबाड रस्त्यावरील एका गृहसंकुलात राहतात. नलिनी आजी या अनंत हलवाई बसस्टॉप परिसरातून बसमध्ये चढत-उतरत असताना ही घटना घडली. गर्दीचा फायदा घेऊन पाठीमागून आलेल्या एका अज्ञात भुरट्या चोराची नजर आजींच्या हातातील सोन्याच्या बांगडीवर पडली. त्याने आजींच्या अगदी जवळ जाऊन “आजी, जरा बाजूला व्हा” अशी हाक मारली आणि मुद्दामहून त्यांना एक जोराचा धक्का दिला. अचानक धक्का लागल्यामुळे नलिनी आजी स्वतःला सावरण्याचा प्रयत्न करत होत्या.

नेमका याच गोंधळाचा फायदा घेत त्या चोरट्याने मोठ्या हातचालाखीने, कोणतीही चाहूल लागू न देता जवळील एका साधनाने आजींच्या हातातील २४ ग्रॅम वजनाची सोन्याची बांगडी कापून किंवा काढून घेतली. या बांगडीची किंमत सुमारे १ लाख २० हजार रुपये इतकी आहे. २५ वर्षांची भावाची आठवण हरपली:चोरटा बांगडी लंपास करून पसार झाला तरी नलिनी आजींना सुरुवातीला काहीच समजले नाही. काही वेळाने जेव्हा त्यांचे लक्ष आपल्या हाताकडे गेले, तेव्हा सोन्याची बांगडी गायब असल्याचे पाहून त्यांना मोठा धक्का बसला. ही बांगडी केवळ एक मौल्यवान दागिना नव्हती, तर त्यांच्या भावाच्या लग्नातील तब्बल २५ वर्षांची जुनी कौटुंबिक आठवण आणि भावाचे प्रेम होते. ही आठवण हिरावली गेल्याने आजींना रडू कोसळले आणि परिसरात हळहळ व्यक्त करण्यात येत आहे.

परिसरात चोरांचा सुळसुळाट; पोलीस तपास सुरू:नलिनी शहा यांनी तात्काळ पोलीस ठाण्यात धाव घेऊन रीतसर तक्रार नोंदवली. पोलिसांनी कल्याण स्टेशन आणि बस डेपो परिसरातील सीसीटीव्ही (CCTV) फुटेज तपासण्यास सुरुवात केली असून, संशयित आरोपीचा माग काढला जात आहे. कल्याण रेल्वे स्टेशन आणि बस डेपो हा अत्यंत गजबजलेला परिसर असल्याने येथे अनेकदा महिला आणि ज्येष्ठ नागरिकांना लक्ष करून दागिने, मोबाईल आणि पाकिटे लांबवण्याच्या घटनांमध्ये मोठी वाढ झाली आहे. पोलिसांनी प्रवाशांना विशेषतः ज्येष्ठ नागरिकांना गर्दीच्या ठिकाणी प्रवास करताना सतर्क राहण्याचे आवाहन केले आहे.