Mumbai Shocked: Luxury Mercedes Car Mows Down On-Duty Police Constables At Marine Drive; Accused Nailed In Nalasopara!

मुंबई: मुंबईतील अत्यंत व्हीआयपी समजल्या जाणाऱ्या मरीन ड्राईव्ह परिसरात रविवारी मध्यरात्री हिट अँड रनची एक थरारक आणि काळजाचा ठोका चुकवणारी घटना घडली आहे. येथे नाकाबंदी दरम्यान कर्तव्यावर तैनात असलेल्या दोन पोलीस कर्मचाऱ्यांना एका भरधाव आलिशान मर्सिडीज कारने जोरदार धडक दिली. या भीषण अपघातात दोन्ही पोलीस गंभीर जखमी झाले असून, सध्यातरी त्यांच्यावर अतिदक्षता विभागात (ICU) उपचार सुरू आहेत. या घटनेमुळे मुंबई पोलीस दलात प्रचंड खळबळ उडाली आहे.

मिळालेल्या माहितीनुसार, मरीन ड्राईव्ह पोलीस ठाण्याचे पोलीस कॉन्स्टेबल कृष्णकांत मिश्रा आणि त्यांचे सहकारी पोलीस कॉन्स्टेबल राठोड हे दोघे रविवारी रात्री नेहमीप्रमाणे मरीन ड्राईव्ह परिसरातील रस्त्यावर नाकाबंदी ड्युटीवर तैनात होते. संशयास्पद वाहनांची तपासणी सुरू असतानाच अचानक एका भरधाव वेगाने आलेल्या आलिशान मर्सिडीज कारने या दोन्ही पोलिसांना जोरदार उडवले. ही धडक इतकी भीषण होती की दोन्ही पोलीस रस्त्यावर दूरवर फेकले गेले आणि गंभीर जखमी झाले.

आरोपी नालासोपाऱ्यातून अटक

अपघात घडल्यानंतर कार चालक थांबण्याऐवजी वाहनाचा वेग वाढवून घटनास्थळावरून अत्यंत चलाखीने फरार झाला. घटनेचे गांभीर्य ओळखून मरीन ड्राईव्ह पोलिसांनी तातडीने संपूर्ण परिसरात नाकाबंदी लागू केली आणि सीसीटीव्ही (CCTV) फुटेजच्या मदतीने फरार कारचा माग काढण्यास सुरुवात केली. पोलिसांनी तांत्रिक तपासाच्या आधारे अवघ्या काही तासांतच कारवाई करत फरार आरोपी चालकाला पालघर जिल्ह्यातील नालासोपारा परिसरातून शोधून काढले आणि त्याला अटक केली. आरोपीवर गुन्हा दाखल करण्यात आला असून, त्याने मद्यप्राशन केले होते का, याचाही तपास पोलीस करत आहेत.