सोळांकुरकरांची सुटका! ७० जणांना जखमी करणाऱ्या 'माकड डॉन'चा धुमाकूळ अखेर थांबला; गावकऱ्यांनी घेतला सुटकेचा निश्वास!

कोल्हापूर: राधानगरी तालुक्यातील सोळांकुर गावात गेल्या सहा दिवसांपासून एका आक्रमक माकडाने अक्षरश: धुमाकूळ घातला होता. या माकडाच्या हल्ल्यात ७० हून अधिक ग्रामस्थ जखमी झाले असून, त्यापैकी ५ ते ७ जणांना गंभीर दुखापत झाली आहे. अखेर वनविभाग आणि रेस्क्यू टीमने या माकडाला जेरबंद करण्यात यश मिळवल्याने गावकऱ्यांनी सुटकेचा निश्वास टाकला आहे.

काय घडले होते?
गेल्या काही दिवसांपासून हे माकड सोळांकुर गावात मुक्तपणे फिरत होते. रस्त्यावरून जाणाऱ्या दुचाकीस्वारांवर आणि पादचाऱ्यांवर अचानक हल्ला करून हे माकड सर्वांना जखमी करत होते. या माकडाच्या भीतीने गावकरी गेल्या सहा दिवसांपासून घरातच कैद होते. गावाची बाजारपेठ आणि दैनंदिन व्यवहार पूर्णपणे ठप्प झाले होते. गावातील परिस्थिती एका 'लॉकडाऊन'सारखी झाली होती.

वनविभागाची मोहीम:
माकडाला पकडण्यासाठी राधानगरी आणि गारगोटी वनविभागाच्या २५ जणांच्या रेस्क्यू टीमने कंबर कसली होती. माकड अत्यंत चपळ असल्याने त्याला पकडताना वनविभागाच्या कर्मचाऱ्यांची मोठी दमछाक झाली. अखेर तांत्रिक बाबी आणि अनुभवी पथकाच्या मदतीने माकडाला जेरबंद करण्यात आले. जखमी व्यक्तींना तातडीने रेबीज लस आणि वैद्यकीय उपचार देण्यात आले आहेत. या माकडाच्या उपद्रवामुळे सोळांकुर गावकऱ्यांच्या आयुष्यातील गेल्या काही दिवसांची ही 'भीतीदायक मालिका' अखेर संपली आहे.