नाशिक: त्र्यंबकेश्वरमध्ये वादळी वाऱ्याचा थरार, सोसाट्यामुळे घरांचे लोखंडी पत्रे अंगावर उडून पडल्याने तीन भाविक गंभीर जखमी

नाशिक: प्रसिद्ध धार्मिक आणि ऐतिहासिक स्थळ असलेल्या त्र्यंबकेश्वर शहरासह परिसरामध्ये हवामानात अचानक झालेल्या बदलामुळे आणि मुसळधार पावसामुळे मोठी दुर्घटना घडली आहे. त्र्यंबकेश्वर शहराच्या मुख्य रस्त्यावरून बुधवारी रात्रीच्या सुमारास काही भाविक कडक पावसात चालले असताना, वादळी वाऱ्याचा वेग इतका प्रचंड होता की एका घराचे लोखंडी पत्रे (टिन शेड) सोसाट्याच्या वाऱ्यामुळे पूर्णपणे उखडले गेले आणि हवेत सुसाट उडत थेट रस्त्यावरून जाणाऱ्या भाविकांच्या अंगावर येऊन कोसळले.

या अचानक घडलेल्या थरारक घटनेमुळे रस्त्यावर चालणाऱ्या भाविकांमध्ये एकच तारांबळ उडाली. हा संपूर्ण भयानक प्रकार जवळच एका घराजवळ बसवलेल्या सीसीटीव्ही (CCTV) कॅमेऱ्यामध्ये अगदी स्पष्टपणे कैद झाला आहे. फुटेजमध्ये दिसत आहे की, रंगीबेरंगी रेनकोट घालून काही भाविक हळूहळू रस्त्यावरून मार्गक्रमण करत असताना अचानक हा लोखंडी पत्रा हवेतून येऊन त्यांच्यावर आदळतो, ज्यामुळे ते खाली कोसळतात. या दुर्दैवी दुर्घटनेत एकूण तीन भाविक जखमी झाले असून, त्यापैकी एकाची प्रकृती अत्यंत चिंताजनक असल्याचे समजते.

या अपघातात गंभीर जखमी झालेल्या भाविकाचे नाव अमित सुभाष आढे (रा. यवतमाळ) असे असून, त्याच्या डोक्याला व शरीराला गंभीर दुखापत झाली आहे. घटना घडल्यानंतर तात्काळ आजूबाजूच्या स्थानिक नागरिकांनी व तरुणांनी कोणतीही वेळ न घालवता धाव घेतली. जखमींना तातडीने उपचारासाठी दुचाकीवरून व इतर वाहनांच्या मदतीने त्र्यंबकेश्वर ग्रामीण रुग्णालयात (सव्-डिस्टिक्ट हॉस्पिटल) दाखल करण्यात आले. तेथे प्राथमिक उपचार केल्यानंतर प्रकृती गंभीर असलेल्या अमित आढे याला पुढील विशेष उपचारासाठी नाशिक जिल्हा शासकीय रुग्णालयात हलवण्यात आले.

या घटनेची गंभीर दखल घेत राज्याचे आपत्ती व्यवस्थापन मंत्री गिरीश महाजन यांनी तात्काळ प्रशासनाला मदतीचे आणि योग्य त्या उपाययोजना करण्याचे कडक निर्देश दिले आहेत. तसेच जिल्हाधिकारी आयुष प्रसाद हे या संपूर्ण प्रकरणावर व जखमींच्या उपचारावर स्वतः जातीने लक्ष ठेवून आहेत. मुसळधार पाऊस आणि सोसाट्याच्या वाऱ्यामुळे त्र्यंबकेश्वर परिसरात भीतीचे वातावरण पसरले असून प्रशासनाकडून नागरिकांना सतर्क राहण्याचे आवाहन करण्यात आले आहे.