रेनॉल्ट क्विड २०२६ भारतात लॉन्च! ४.५३ लाखांपासून सुरुवात, नवीन फीचर्स आणि उत्तम सुरक्षेसह मारुतीला टक्कर.

मुंबई: फ्रेंच वाहन निर्माता कंपनी रेनॉल्टने (Renault) आपली अत्यंत लोकप्रिय एंट्री-लेव्हल हॅचबॅक कार 'क्विड २०२६' (Renault Kwid 2026) अधिकृतपणे भारतीय बाजारपेठेत लॉन्च केली आहे. नवीन मॉडेलमध्ये आकर्षक डिझाइन बदल, सुधारित इंटिरियर आणि सुरक्षेसाठी महत्त्वाचे अपडेट्स देण्यात आले आहेत. या कारची सुरुवातीची एक्स-शोरूम किंमत ४.५३ लाख रुपये ठेवण्यात आली आहे.

 

नवीन बदल आणि डिझाइन रेनॉल्टने या मॉडेलमध्ये काही नवीन बदल केले आहेत:

• कारमध्ये नवीन ३-स्पोक स्टीयरिंग व्हील देण्यात आले आहे, ज्यावर इन्फोटेनमेंट सिस्टमचे कंट्रोल्स आहेत.

• बाह्य रूपासाठी ३डी रेनॉल्ट बॅज, १४-इंच स्टील व्हील्ससाठी ड्युअल-टोन व्हील कव्हर्स आणि सिल्व्हर फिनिशसह नवीन क्विड बॅजिंग देण्यात आले आहे.

• कारमध्ये ८-इंच टचस्क्रीन इन्फोटेनमेंट सिस्टम, वायरड अँड्रॉईड ऑटो आणि ॲपल कारप्ले, सेमी-डिजिटल इन्स्ट्रुमेंट क्लस्टर, मॅन्युअल एअर कंडिशनिंग आणि पॉवर विंडोज यांसारखी लोकप्रिय फीचर्स कायम ठेवण्यात आली आहेत.

 

सुरक्षेवर भर (Safety Upgrades) सुरक्षेच्या दृष्टीने कंपनीने मोठी पावले उचलली आहेत. आता इव्होलूशन व्हेरिएंटमध्ये ड्युअल एअरबॅग्स, तर क्लायंबर व्हेरिएंटमध्ये ६ एअरबॅग्स देण्यात आल्या आहेत. याव्यतिरिक्त, रिअर पार्किंग कॅमेरा, पार्किंग सेन्सर्स, टायर प्रेशर मॉनिटरिंग सिस्टम, एबीएस विथ ईबीडी (ABS with EBD), आणि ऑटोमॅटिक व्हेरिएंटमध्ये 'हिल स्टार्ट असिस्ट' (Hill Start Assist) सारखी फीचर्स उपलब्ध आहेत.

इंजिन आणि परफॉर्मन्स रेनॉल्ट क्विडमध्ये पूर्वीप्रमाणेच १.० लिटर, ३-सिलेंडर पेट्रोल इंजिन देण्यात आले आहे, जे ६९ एचपी पॉवर आणि ९२.५ एनएम टॉर्क निर्माण करते. हे इंजिन ५-स्पीड मॅन्युअल किंवा ५-स्पीड ऑटोमॅटिक (AMT) गिअरबॉक्सच्या पर्यायामध्ये उपलब्ध आहे. तसेच, मॅन्युअल व्हेरिएंटसाठी ७०,४५० रुपयांत रेट्रोफिटेड सीएनजी (CNG) किटचा पर्यायही दिला आहे.

व्हेरिएंट आणि किंमती (एक्स-शोरूम) नवीन क्विड दोन प्रमुख व्हेरिएंट्समध्ये येते:

१. इव्होलूशन (५-स्पीड मॅन्युअल): ४.५३ लाख रुपये

२. इव्होलूशन (५-स्पीड ऑटोमॅटिक): ४.९० लाख रुपये

३. क्लायंबर (५-स्पीड मॅन्युअल): ५.१५ लाख रुपये

४. क्लायंबर (५-स्पीड ऑटोमॅटिक): ५.६१ लाख रुपये

भारतीय बाजारात ही कार मारुती सुझुकी अल्टो के१० (Maruti Suzuki Alto K10) सारख्या गाड्यांना जोरदार स्पर्धा देणार आहे.