Maharashtra Politics : शिंदे गटाच्या नेत्याच्या मुलाला मारण्यासाठी ४ कोटींची सुपारी; पोलिसांत गुन्हा दाखल, राजकीय वर्तुळात खळबळ

​kalyan News : कल्याण-डोंबिवलीच्या राजकारणात एक मोठी आणि धक्कादायक वृत्त समोर आलं आहे. या वृत्ताने राजकीय वर्तुळात मोठी खळबळ उडाली आहे. राजकारणामध्ये एकमेकांचे वैमनस्य, सूड आणि प्रतिस्पर्धेतून अनेकदा संघर्ष होताना आपण पाहिलं आहे. पण आता थेट ४ कोटी रुपयांची सुपारी देऊन हत्येचा कट रचल्याचा गंभीर गुन्हा दाखल झाला आहे.

शिवसेना (शिंदे गट) चे कल्याण तालुकाप्रमुख तथा माजी नगरसेवक महेश पाटील यांचा मुलगा आणि उपशहर प्रमुख सुजित नलावडे यांच्या हत्येचा कट रचल्याप्रकरणी राष्ट्रवादी काँग्रेस (शरदचंद्र पवार गट) चे नेते वंडार पाटील यांच्यासह तिघांविरुद्ध डोंबिवलीच्या विष्णूनगर पोलीस ठाण्यात गुन्हा दाखल करण्यात आला आहे.

महेश पाटील यांना वंडार पाटील यांच्या मुलाच्या हत्येप्रकरणी नुकतंच न्यायालयाने निर्दोष सोडले होते, याच रागातून त्यांनी हा सूडाचा कट रचल्याचं समोर आलं आहे. इतकंच नाही, तर 'बदल्यात मुलगा' या भूमिकेतून महेश पाटील यांच्या मुलाला संपवण्याचाही कट होता. सध्या याप्रकरणी विष्णू नगर पोलीस ठाण्यात राष्ट्रवादी शरदचंद्र पवार गटाचे नेते वंडार पाटील ,​मुजम्मिल बुबेरे (सुपारी घेणारा) अन्य ​एक अज्ञात व्यक्ती विरोधात गुन्हा दाखल केला आहे.

तसेच या प्रकरणाचा गुन्हा ठाणे क्राईम ब्रँच कडे वर्ग केला आहे. मात्र या प्रकरणात राष्ट्रवादी काँग्रेस पार्टीचे जिल्हाध्यक्ष वंडार पाटील यांनी आपल्यावर लावलेले आरोप खोटे असून अशा प्रकारची कुठली सुपारी आम्ही दिली नाही. वंडार पाटील पुढे म्हणाले, या प्रकरणात निर्दोष सुटका झाली आहे आणि यासाठी हायकोर्टात अपील करू नये यासाठी हा गुन्हा दाखल करण्यात आल्याचा आरोप केला आहे'

या घटनेमुळे घाबरलेल्या महेश पाटील यांनी पोलिसांकडे मागणी करताना म्हटलं की, काही दिवसांपूर्वी पुण्यात आई-वडिलांच्या रागात मुलाची ज्या पद्धतीने हत्या झाली. त्याच प्रकारे माझ्या मुलाचीही हत्या होऊ शकते. त्यामुळे या आरोपींना त्वरित अटक करावी'. मात्र या प्रकरणातील आरोपी राष्ट्रवादी काँग्रेस पार्टीचे जिल्हाध्यक्ष वंडार पाटील यांनी आपल्यावर लावलेले आरोप खोटे असल्याचं म्हटलं आहे.