Chhagan Bhujbal : “फडणवीसांनी भाषणाची स्क्रिप्ट दिली”, रोहित पवारांच्या आरोपावर भुजबळांचं उत्तर; म्हणाले, “पूर्वी शरद पवार…”

ओबीसी एल्गार सभेतील छगन भुजबळांच्या भाषणावर राष्ट्रवादीच्या शरद पवार गटातील आमदार रोहित पवार यांनी टीका केली आहे. रोहित पवार म्हणाले, भुजबळांच्या भाषणाची स्क्रिप्ट देवेंद्र फडणवीस यांनी लिहून दिली होती.

रोहित पवार यांच्या टीकेला छगन भुजबळ यांनी उत्तर दिलं आहे. भुजबळ यांनी काही वेळापूर्वी प्रसारमाध्यमांशी बातचीत केली. यावेळी भुजबळ म्हणाले, मला कोणीही स्क्रिप्ट देऊ शकत नाही, हे सगळ्यांना माहिती आहे. पूर्वी शरद पवार स्क्रिप्ट देत नव्हते, अजित पवार ना ,फडणवीस, ना एकनाथ शिंदे, मला कोणीच स्क्रिप्ट देत नाही. गेल्या ३५ वर्षांपासून मी हे काम करत आहे. मी ओबीसींचं काम हाती घेतलं आहे आणि हेच माझं स्क्रिप्ट आहे.

अन्न आणि नागरी पुरवठा मंत्री छगन भुजबळ म्हणाले, छत्रपती शिवाजी महाराज, महात्मा फुले, राजर्षी शाहू महाराज, डॉ. बाबासाहेब आंबेडकर यांचे विचार हेच माझं स्क्रिप्ट आहे. मंडल आयोगाचा अहवाल हे माझं स्क्रिप्ट आहे. बहुजन समाज, ओबीसी समाजाचं स्क्रिप्ट तेच माझं स्क्रिप्ट.