डेटिंग ॲपवरून ओळख, 'ड्रॉप शिपिंग'च्या बहाण्याने तरुणाची १५ लाखांची फसवणूक; हडपसर पोलिसांत गुन्हा दाखल

पुणे: ऑनलाईन डेटिंग ॲपवरून ओळख करून घेऊन, त्यानंतर व्यवसायाचे आमिष दाखवून एका व्यक्तीची १५ लाख ३१ हजार रुपयांची फसवणूक केल्याचा धक्कादायक प्रकार उघडकीस आला आहे. याप्रकरणी हडपसर पोलीस ठाण्यात 'अनाया शर्मा' आणि संबंधित बँक खातेधारकांविरुद्ध गुन्हा दाखल करण्यात आला आहे.

नेमकी घटना काय?
मिळालेल्या माहितीनुसार, फिर्यादी यांची 'बीलॉंग' (Belong) नावाच्या डेटिंग ॲपवर एका तरुणीशी ओळख झाली होती. तिने स्वतःच नाव अनाया शर्मा असं सांगितलं. १३ फेब्रुवारी २०२६ ते २४ एप्रिल २०२६ या कालावधीत ही ओळख वाढत गेली. दरम्यान, आरोपी अनाया शर्मा हिने फिर्यादींना 'ड्रॉप शिपिंग' (Drop Shipping) बिझनेसबाबत माहिती दिली आणि यात मोठा नफा असल्याचे आमिष दाखवले.
त्यानंतर एका व्हॉट्सॲप नंबरवरून व्यवसायाची अधिक माहिती देऊन फिर्यादींना एक लिंक पाठवण्यात आली. या लिंकद्वारे एक अकाउंट तयार करण्यास सांगून, ऑनलाइन प्रॉडक्टची खरेदी-विक्री करण्याच्या नावाखाली फिर्यादींचा विश्वास संपादन केला. आरोपींनी वेगवेगळ्या टप्प्यांवर फिर्यादींना विविध बँक खात्यांमध्ये एकूण १५ लाख ३१ हजार रुपये भरण्यास भाग पाडले.

अशी झाली फसवणूक
मोठी रक्कम गुंतवल्यानंतरही फिर्यादींना कोणताही परतावा (Profit) मिळाला नाही. जेव्हा त्यांनी आपली मूळ रक्कम परत मागितली, तेव्हा आरोपींकडून टाळाटाळ करण्यात आली. आपली आर्थिक फसवणूक झाल्याचे लक्षात येताच फिर्यादींनी पोलिसांत धाव घेतली.

पोलीस कारवाई
हडपसर पोलिसांनी या तक्रारीवरून गुन्हा दाखल केला आहे. यात खालील कलमांचा समावेश आहे:
भारतीय न्याय संहिता २०२३: कलम ३१९ (२) (तोतयागिरी करून फसवणूक), ३१८ (४) (फसवणूक), ३ (५) (सामायिक उद्देश).
माहिती तंत्रज्ञान अधिनियम (IT Act): कलम ६६.

पुणे पोलीस सध्या संबंधित व्हॉट्सॲप नंबरचा वापरकर्ता आणि ज्या बँक खात्यांवर पैसे ट्रान्सफर झाले आहेत, त्या खातेधारकांचा शोध घेत आहेत.
नागरिकांना आवाहन: डेटिंग ॲप्स किंवा सोशल मीडियावरून होणाऱ्या ओळखीनंतर कोणत्याही आर्थिक गुंतवणुकीचे व्यवहार करताना काळजी घ्यावी. अनोळखी व्यक्तींनी दिलेल्या लिंकवर पैसे गुंतवू नयेत, असे आवाहन सायबर पोलिसांकडून करण्यात आले आहे.