अवैध वाळू उपशाची तक्रार केल्याचा राग; शिवसेना नेत्यावर घरात घुसून जीवघेणा हल्ला, पत्नीलाही दिली गंभीर धमकी!

बीड: बीड जिल्ह्यातील गेवराई तालुक्यात अवैध वाळू उपशाविरोधात आवाज उठवणाऱ्या शिवसेना उपजिल्हाप्रमुख नारायण शिंदे यांच्यावर वाळू माफियांनी प्राणघातक हल्ला केल्याची धक्कादायक घटना समोर आली आहे. या घटनेमुळे परिसरात एकच खळबळ उडाली असून, वाळू माफियांनी पोलिसांचा धाक उरलेला नसल्याचे पुन्हा एकदा सिद्ध झाले आहे.

नेमकी घटना काय? गेवराई तालुक्यातील नागझरी परिसरात मोठ्या प्रमाणावर अवैध वाळू उपसा सुरू होता. या बेकायदेशीर कामामुळे पर्यावरणाचे नुकसान होत असल्याने नारायण शिंदे यांनी जिल्हाधिकाऱ्यांकडे लेखी तक्रार दाखल केली होती. या तक्रारीचा राग मनात धरून, प्रवीण ऊर्फ लल्ल्या शिंदे, विकास आव्हाड आणि माऊली भवर या तिघांनी थेट नारायण शिंदे यांच्या घरी प्रवेश केला. लोखंडी रॉड आणि लाकडी दांडक्याने शिंदे यांना बेदम मारहाण करत त्यांच्यावर जीवघेणा हल्ला करण्यात आला.

महिला आरोपींची दहशत आणि धमकी: हल्ल्यानंतर पोलिसांनी गुन्हा दाखल केल्याची माहिती मिळताच, वाळू माफियांचे नातेवाईक आक्रमक झाले. अहिल्यानगरमधील एक वादग्रस्त 'रील स्टार' कोमल काळे हिला सोबत घेऊन काही महिलांनी पुन्हा शिंदे यांच्या घरी धाव घेतली. या महिलांनी शिंदे आणि त्यांच्या कुटुंबीयांना पुन्हा मारहाण करत, "तक्रार मागे घे, नाहीतर बलात्काराच्या खोट्या गुन्ह्यात अडकवू," अशी धमकी दिली. इतकेच नव्हे तर, नारायण शिंदे यांच्या पत्नी अश्विनी शिंदे यांचे हातपाय तोडून त्यांना विहिरीत फेकून देण्याचीही धमकी देण्यात आली. हा सर्व प्रकार घरात बसवलेल्या सीसीटीव्ही कॅमेऱ्यात कैद झाला आहे.

पोलीस तपासावर प्रश्नचिन्ह: या घटनेचा सीसीटीव्ही फुटेज पुरावा म्हणून उपलब्ध असूनही, पोलिसांनी अद्याप मुख्य आरोपींना अटक केलेली नाही. केवळ एका आरोपीला नोटीस बजावण्यात आल्याचे समजते. एका लोकप्रतिनिधीवर आणि त्यांच्या कुटुंबीयांवर सरेआम हल्ला आणि महिलांकडून धमकावण्याचा प्रकार घडल्यानंतरही पोलिसांच्या या संथ कारभारावर नागरिकांनी तीव्र संताप व्यक्त केला आहे.

सविस्तर वाचा, लिंक कमेंट मध्ये  https://punenews24.in/