Pune : दुचाकीसाठी तासाला फक्त ४ रुपये! पुण्यातील ‘या’ ६ रस्त्यांवर सुरू ‘पे अँड पार्क’; महापालिकेची सुविधा कुठे आणि कशी?

Pune : पुण्यातील सर्वाधिक वर्दळीच्या लक्ष्मी रस्ता, जंगली महाराज रस्ता, नामदार गोपाळ कृष्ण गोखले रस्ता (फर्ग्युसन कॉलेज), बालेवाडी हायस्ट्रीट, विमाननगर रस्ता आणि बिबवेवाडी येथील मुख्य रस्ता अशा सहा ठिकाणी ‘पे अँड पार्क’ योजना राबवण्यासाठी महापालिकेच्या निविदांना प्रतिसादच मिळत नसल्याने त्याला पुन्हा मुदतवाढ देण्यात आली आहे. महापालिकेच्या निवडणुकांची प्रक्रिया पूर्ण झाली असून, आचारसंहिता संपल्यानंतर याबाबतचा पुढील निर्णय घेतला जाणार आहे.

महापालिकेच्या सर्वसाधारण सभेने पार्किंग धोरणाला 2018 मध्ये मान्यता दिली होती. त्यानंतर सात वर्षांनी ‘पे अँड पार्क’ला मुहूर्त लागला असून, दुचाकींसाठी दर तासाला चार रुपये आकारण्यात येणार आहेत. या रस्त्यांवर सहा हजार 344 दुचाकी आणि 618 चारचाकींचे पार्किंग करणे शक्य असून, त्यामधून महापालिकेला सुमारे 12 कोटी रुपयांचे उत्पन्न मिळणार असल्याचे निविदांवरून स्पष्ट झाले आहे.

Pune Traffic : सोमवारी पुण्यात प्रमुख रस्ते बंद; शाळा-महाविद्यालयांना सुट्टी, नागरिकांनी ‘हे’ मार्ग टाळावेत व पर्यायी मार्ग वापरावेत

शहरातील रस्त्यांवर बेशिस्तपणे वाहने पार्क होत असल्याने कोंडीचे प्रकार घडत आहेत. लक्ष्मी रस्त्यावर स्थानिक व्यावसायिकांच्या कर्मचाऱ्यांची वाहने सकाळीच पार्क करण्यात येत असल्याने खरेदीसाठी येणाऱ्या नागरिकांना पार्किंग उपलब्ध होत नाही. येथील महापालिकेच्या वाहनतळावर दुचाकीसाठी प्रतितास 20 रुपये आकारण्यात येतात. महापालिकेने ताशी तीन रुपये दर निश्चित केला असला, तरी वाहनतळ चालकांकडून मनमानी करण्यात येते. अशा परिस्थितीत या रस्त्यावर नागरिकांना अधिकाधिक पार्किंग उपलब्ध होणे गरजेचे आहे. महापालिका प्रशासनाने आठ वर्षांनंतर या रस्त्यांवर पार्किंग शुल्क आकारण्याचा निर्णय घेतला असला, तरी त्याच्या अंमलबजावणीत अडथ‌ळ्यांची शर्यत सुरू झाली आहे.

शहरातील रस्त्यांवर सुमारे दोन ते तीन लाख बेवारस वाहने पडून असल्याची शक्यता महापालिका आयुक्त नवलकिशोर राम यांनी नुकतीच व्यक्त केली आहे. वर्दळीच्या रस्त्यांवर ठरावीक व्यक्तींकडून तासन् तास वाहने पार्क करण्यात येत असल्याने इतर वाहन चालकांना पार्किंग मिळत नसल्याचे प्रकार सर्रास होत आहेत. या पार्श्वभूमीवर पार्किंग धोरणाची अंमलबजावणी करण्याची मागणी प्रशासनातून जोर धरत होती. वाहतूक पोलिसांकडूनही ‘पे अँड पार्क’साठी आग्रह धरण्यात येत आहे. या पार्श्वभूमीवर सात वर्षे प्रलंबित असलेल्या प्रस्तावावर निर्णय घेऊन प्रथमत: सहा रस्त्यांवर ‘पे अँड पार्क’ सुरू करण्याचा निर्णय घेण्यात आला आहे.