Pune : पुण्यात दोन सख्ख्या बहिणींचा दुर्दैवी मृत्यू; मकर संक्रांतीला शिंदे कुटुंबावर दुःखाचा डोंगर

Pimpri-Chinchwad : पिंपरी-चिंचवड येथील काळेवाडी परिसरात भरधाव ट्रकच्या धडकेत दुचाकीवरून जाणाऱ्या दोन सख्ख्या बहिणींचा दुर्दैवी मृत्यू झाल्याची घटना घडली आहे. ही घटना काळेवाडी येथील धनगर बाबा मंदिरासमोरील पेट्रोल पंपाजवळ घडल्याची माहिती आहे. या घटनेमुळे परिसरात एकच हळहळ व्यक्त केली जात आहे.

गाडीवरुन जाताना आयशरची भीषण धडक
ऋतुजा पांडुरंग शिंदे आणि नेहा पांडुरंग शिंदे (वय 20) अशी मृत्यू झालेल्या बहिणींची नावे आहेत. याप्रकरणी मिळालेल्या अधिक माहितीनुसार, नेहा आणि ऋतुजा या दोघी दुचाकीवरून प्रवास करत होत्या. तेवढ्यात काळेवाडी परिसरात भरधाव आयशर ट्रकने त्यांच्या दुचाकीला जोरदार धडक दिली. या अपघातात दोघीही गंभीर जखमी झाल्या. त्यानंतर स्थानिक नागरिकांच्या मदतीने त्यांना तातडीने रुग्णालयात दाखल करण्यात आले. मात्र तोपर्यंत खूप उशिर झालेला होता. रुग्णालयात उपचारापूर्वीच डॉक्टरांनी त्या दोघींना तपासून मृत घोषित केले.

Pune : पुण्यात भीषण अपघात; दोन वाहनांची समोरासमोर धडक, एकाचा मृत्यू, पुणे हळहळलं

या घटनेची माहिती मिळताच पोलिसांनी घटनास्थळी तात्काळ धाव घेतला. पोलिसांनी प्रकरणाची नोंद करुन पंचनामा केला. अपघातास कारणीभूत ठरलेल्या ट्रक चालक जितेंद्र निराले याला पोलिसांनी ताब्यात घेतले असून त्याच्याविरोधात गुन्हा दाखल करण्यात आला आहे. या प्रकरणाचा पुढील तपास पोलिसांकडून करण्यात येत आहे.

या दुर्दैवी घटनेमुळे परिसरात एकच हळहळ व्यक्त करण्यात येत असून शिंदे कुटुंबावर दुःखाचा डोंगर कोसळला आहे. ऐन मकर संक्रांतीच्या दिवशी दोन सख्ख्या बहिणींचा मृत्यू झाल्याने शिंदे कुटुंबावर मोठा आघात झाला आहे. या दुर्दैवी घटनेमुळे संपूर्ण परिसरात हळहळ व्यक्त केली जात आहे. मकर संक्रांती हा सण महिलांसाठी अत्यंत महत्त्वाचा मानला जातो. मात्र, याच पवित्र सणाच्या दिवशी दोन बहिणींवर मृत्यूने झडप घातल्याने परिसरात एकच शोककळा पसरली आहे.

एकाच घरातील दोन मुलींचा एकाचवेळी मृत्यू झाल्याने शिंदे कुटुंबावर दुःखाचा डोंगर कोसळला असून कुटुंबीयांनी मन हेलावून टाकणारा आक्रोश केला. हे पाहून साऱ्यांच्या डोळ्यात पाणी तरळलं होतं.