Pune : क्राइम ब्रांचच्या कारवाईनंतर अजित पवार ठाम; “नरेश अरोरा आमच्याच पाठिशी” म्हणत दिली पहिली प्रतिक्रिया

Pune : उपमुख्यमंत्री अजित पवार यांचे राजकीय सल्लागार असलेल्या नरेश अरोरा यांच्या पुण्यातील वाकडेवाडी परिसरात असणाऱ्या कार्यालयावर आज दुपारी पुणे पोलिसांनी कारवाई केली. पुणे पोलिसांना डिझाईन बॉक्स या कंपनीच्या विरोधात एक तक्रार प्राप्त झाली होती. ही तक्रार लेखी नसून फक्त तोंडी होती. या तक्रारीची शहानिशा करण्यासाठी या ठिकाणी पुणे पोलिसांची क्राइम ब्रांच आली होती.या कारवाईनंतर उपमुख्यमंत्री अजित पवार यांनी पहिली प्रतिक्रिया दिली आहे.

नरेश अरोरा यांच्या कारवाईवर अजित पवार यांनी पहिली प्रतिक्रिया दिली आहे. अजित पवारांनी म्हटलं की, 'राष्ट्रवादी काँग्रेस पक्षासाठी कार्यरत असलेले नरेश अरोरा आणि त्यांची संस्था डिझाइनबॉक्स्ड यांच्या पुणे कार्यालयात आज क्राईम ब्राँचचे काही अधिकारी माहिती घेण्याच्या उद्देशाने उपस्थित झाले होते. संबंधित अधिकाऱ्यांनी केलेल्या प्रक्रियेदरम्यान आवश्यक ती माहिती देण्यात आली. या संपूर्ण सहकार्य करण्यात आलं. या प्रक्रियेत कोणतीही आक्षेपार्ह बाब किंवा कोणतीही अनियमितता आढळून आलेली नाहीये'.

Kalyan : प्रचार रॅलीदरम्यान पक्षाचा झेंडा हायटेन्शन वायरला धडकला; अचानक आग, कार्यकर्ता भाजला

'राष्ट्रवादी काँग्रेस पक्ष हे स्पष्ट करू इच्छितो की, या संपूर्ण विषयात पक्ष हा नरेश अरोरा आणि त्यांची संस्था 'डिझाइनबॉक्स्ड' यांच्या पाठीशी ठामपणे उभा आहे. राष्ट्रवादी काँग्रेस पक्ष कायद्याचा सन्मान करतो. सर्व वैधानिक प्रक्रियांना सहकार्य करण्यावर विश्वास ठेवतो. या प्रकरणातही संबंधित यंत्रणांना आवश्यक ते संपूर्ण सहकार्य करण्यात आले आहे, असे अजित पवार पुढे म्हणाले.

'कोणताही संभ्रम, अफवा किंवा अनावश्यक नॅरेटिव्ह पसरवू नये, असे आम्ही आवर्जून सांगू इच्छितो. तथ्यांच्या आधारेच कोणताही निष्कर्ष काढावा, हीच आमची भूमिका आहे. या संपूर्ण विषयावर राष्ट्रवादी काँग्रेस पक्ष संयम, जबाबदारी आणि स्पष्टतेसह आपली भूमिका मांडत आहे, अशी भूमिका अजित पवारांनी मांडली.