Pune : पुणेकरांनो, तुमचा प्रवास होणार आणखी जलद; राज्य सरकारकडून दोन नव्या मेट्रो मार्गिकांना मंजुरी, जाणून घ्या सविस्तर

Pune : मेट्रो टप्पा - दोन खडकवासला ते हडपसर-खराडी मेट्रो मार्गिके अंतर्गत हडपसर ते लोणी काळभोर आणि हडपसर बस डेपो ते सासवड रोड या दोन मेट्रो मार्गिकांना गुरुवारी राज्य सरकारने मान्यता दिली. त्यामुळे आता या मार्गिका मान्यतेसाठी केंद्र सरकारकडे पाठवल्या जाणार आहेत. या दोन मार्गिकांमुळे हडपसर, फुरसुंगी, लोणी काळभोर आणि सासवड या वाढत्या उपनगरांना मेट्रो सेवा जोडल्याने वाहतुकीचा वेग वाढण्यास मदत होणार आहे. त्यामुळे या भागातील नागरिकांना जलद वाहतुकीची सुविधा उपलब्ध होणार आहे.

हडपसर ते लोणी काळभोर आणि हडपसर बस डेपो ते सासवड रोड या दोन मार्गिकांना मुख्यमंत्र्यांच्या अध्यक्षतेखाली मंत्रालयात मंत्रिमंडळ पायाभूत सुविधा समितीच्या बैठकीत नोव्हेंबरच्या पहिल्या आठवड्यात मान्यता देण्यात आली होती. त्यानंतर राज्य सरकारने मान्यता दिल्याचा शासन आदेश गुरुवारी काढला. मेट्रोच्या हडपसर ते लोणी काळभोर आणि हडपसर बस डेपो ते सासवड रोड या दोन उपमार्गिका एकूण १६ किलोमीटर लांबीच्या असून, त्यात एकूण १४ उन्नत स्थानकांचा समावेश आहे. या दोन्ही उपमार्गिकांसाठी पाच हजार ७०४ कोटी रुपये खर्च येणार आहे. हडपसर ते लोणी काळभोर हा मार्ग ११.१०२ किलोमीटर लांबीचा असेल.

Pune : पुणे-मुंबई मार्गावरील १७ गाड्या रद्द; लोकल सेवेलाही फटका, संपूर्ण यादी जाहीर

हडपसर बस डेपो ते सासवड रोड हा मार्ग ५.५५७ किलोमीटर लांबीचा असणार आहे. या प्रकल्पासाठी पुणे महापालिकेने जमीन, भूसंपादन आणि पुर्नवसन यासाठी ४०३. ३६ कोटी रुपये महामेट्रोला देण्याचे निर्देश दिले आहेत. हे मार्ग डिसेंबर २०२९ पर्यंत पूर्ण करण्याची दक्षता महामेट्रो व महापालिकेने घ्यावी, असे आदेशात म्हटले आहे. या पूर्णतः उन्नत मेट्रो प्रकल्प महामेट्रोमार्फत करण्यात येणार आहे. या दोन्ही प्रकल्पांमुळे वाहतूक कोंडीपासून नागरिकांना दिलासा मिळेल.