Pune Metro : पुणे मेट्रोसाठी ‘फीडर बस’ सेवा प्रस्तावित; PMPMLला नवा पर्याय, पहिल्या टप्प्यात दोन मार्गांवर सुरूवात

Pune : पुणे महानगर परिवहन महामंडळाकडून (पीएमपी) शहर व पिंपरी-चिंचवडमध्ये सार्वजनिक बससेवा दिली जात असतानाच, मेट्रो स्थानकांपासून लगतच्या परिसरात पूरक सेवा (फीडर सर्व्हिस) देण्यासाठी आता ‘महाराष्ट्र मेट्रो रेल्वे कॉर्पोरेशन’कडूनही (महामेट्रो) चाचपणी केली जाणार आहे. त्यासाठी खासगी कंपन्यांकडून स्वारस्य प्रस्ताव मागविले असून, यामुळे थेट पीएमपीला स्पर्धक सेवा निर्माण होणार आहे. त्यामुळे हा स्वतंत्र बसचा घाट प्रवाशांसाठी आहे, की ठेकेदारांसाठी असा प्रश्न उपस्थित केला जात आहे.

मेट्रोचा पहिला ३१ किमीचा टप्पा पूर्ण कार्यान्वित झाल्यानंतरही गेल्या दोन ते तीन महिन्यांत मेट्रोची प्रवासी संख्या कमी होताना दिसते आहे. प्रवाशांसाठी ‘पीएमपी’कडून मर्यादित स्वरूपात फीडर सेवा दिली जात असल्याने मेट्रोसाठीची स्वतंत्र सेवा सुरू करण्यासाठी महामेट्रोकडून पावले टाकली आहेत. खासगी ठेकेदारासमवेत सार्वजनिक खासगी भागीदारी स्वरूपात (पीपीपी) ही बससेवा कार्यान्वित करण्याचे उद्दिष्ट असून, त्यासाठी इच्छुक कंपन्यांकडून प्रस्ताव मागविण्यात आले आहेत.

काय आहे प्रस्ताव?
फीडर बस सेवेसाठी पहिल्या टप्प्यात रामवाडी स्थानकापासून खराडी आणि लोहगाव विमानतळ या दोन मार्गांवर बससेवा सुरू करण्याचा प्रस्ताव आहे.
दोन्ही सेवा एकाच वेळी
सध्या रामवाडी मेट्रो स्थानकापासून दर १५ मिनिटांनी विमानतळासाठी बससेवा उपलब्ध आहे; शिवाय खराडी किंवा खराडी बायपाससाठी दर पाच ते १० मिनिटांनी बस मिळू शकते. याच मार्गावर पुढे मेट्रोचा विस्तार अपेक्षित आहे.

स्वतंत्र बससेवा कशासाठी?
पुणे महानगर परिसरात ‘पीएमपी’कडून आत्ताही ठेकेदारामार्फत बस चालविल्या जातात. त्यामुळे महामेट्रोकडून स्वतंत्र बससेवा सुरू झाल्यास या दोन्ही सेवांची एकमेकांशी स्पर्धा होणार असून, त्यातून प्रवाशांचा फायदा होण्याऐवजी तोटाच होण्याची भीती आहे. महामेट्रोच्या फीडर सेवेसाठी त्यांनी बस उपलब्ध करून दिल्यास पीएमपी त्याचे संचलन करील, असा प्रस्ताव यापूर्वीच देऊनही स्वतंत्र बससेवा सुरू करण्याचे प्रयोजन नक्की काय, याचा उलगडा झालेला नाही. पुणे महानगरासाठी सार्वजनिक वाहतुकीसाठी एकच प्राधिकरण निर्माण करण्यासाठीच आता सरकारला निर्णय घ्यावा लागेल.