नाशिकमध्ये म्हाडा घोटाळ्याचा मोठा स्फोट! बनावट नकाशे व फेरफार नोंदींद्वारे फसवणूक; तहसील कार्यालयातील २ अधिकाऱ्यांना अटक

नाशिक: राज्यभरात प्रचंड गाजत असलेल्या नाशिकमधील बहुचर्चित 'म्हाडा' (MHADA) आणि भूखंड फसवणूक प्रकरणात शहर गुन्हे शाखेने मोठी कारवाई केली आहे. भूमी अभिलेख कार्यालयाचे बनावट मोजणी नकाशे, खोटे फेरफार दस्तऐवज आणि बनावट कागदपत्रांच्या आधारे म्हाडासह शासनाची कोट्यवधी रुपयांची फसवणूक केल्याप्रकरणी नाशिक तहसील कार्यालयातील दोन आजी-माजी मंडल अधिकाऱ्यांना सरकारवाडा पोलिसांनी अटक केली आहे. न्यायालयासमोर हजर केले असता न्यायाधीशांनी दोघांनाही ३ ऑगस्टपर्यंत पोलिस कोठडी सुनावली आहे.

अटक करण्यात आलेले संशयित: अटक करण्यात आलेल्यांमध्ये नाशिक तहसील कार्यालयात सध्या कार्यरत असलेले मंडल अधिकारी दिलीप कचरू वामन आणि निवृत्त मंडल अधिकारी श्याम एकनाथ बोरसे यांचा समावेश आहे. या अटकेच्या कारवाईमुळे महसूल आणि भूमी अभिलेख विभागात प्रचंड खळबळ उडाली आहे.

तपासात समोर आलेले गंभीर आरोप: शहर गुन्हे शाखेने दिलेल्या माहितीनुसार, संशयित दिलीप वामन आणि श्याम बोरसे यांनी आपल्या पदाचा गैरवापर करत विकासक, जमीनमालक आणि गुंतवणूकदारांशी संगनमत केले. त्यांनी भूमी अभिलेख कार्यालयाचे बनावट मोजणी नकाशे, हिस्सा फॉर्म क्रमांक ४ व १२, गटबुक तसेच जुन्या कागदपत्रांची कोणतीही कायदेशीर पडताळणी न करता त्यावर प्रत्यक्ष कारवाया केल्याचे निष्पन्न झाले आहे.

तहसील कार्यालयाचे कोणतेही अधिकृत आदेश किंवा पत्र नसतानाही १४ सर्व्हे व गटांमधील फेरफार नोंदी बेकायदेशीररीत्या मंजूर आणि प्रमाणित केल्याचा गंभीर आरोप त्यांच्यावर आहे.

म्हाडाचे नियम डावलण्यासाठी कृत्रिम भूखंड विभाजन: राज्य शासनाच्या २०१३ च्या सर्वसमावेशक गृहनिर्माण धोरणानुसार, ४,००० चौरस मीटरपेक्षा मोठ्या भूखंडांवर २० टक्के जागा आर्थिकदृष्ट्या दुर्बल (EWS) आणि अल्प उत्पन्न गटासाठी राखीव ठेवणे बंधनकारक आहे. मात्र, विकासकांना फायदा पोहोचवण्यासाठी आणि म्हाडाचा २० टक्के आरक्षणाचा नियम टाळण्यासाठी बनावट मोजणी नकाशे, खोटे आकारफोड पत्रके सादर करून भूखंडांचे कृत्रिम व बेकायदेशीर विभाजन करण्यात आले. यामुळे म्हाडा आणि राज्य सरकारचे प्रचंड आर्थिक व कायदेशीर नुकसान झाले.

पूर्वीही झाल्या आहेत अनेक बड्या अधिकाऱ्यांच्या अटका: या बहुचर्चित म्हाडा फसवणूक प्रकरणात विशेष तपास पथकाकडून (SIT) सखोल चौकशी सुरू असून आतापर्यंत एकूण ९ जणांना अटक करण्यात आली आहे. यापूर्वी बांधकाम व्यावसायिक सोनू मनवानी, दीपक करमचंदाणी, नायब तहसीलदार नितीन पाटील, भूमी अभिलेख विभागाचे उपअधीक्षक बिपिन काजळे, महापालिकेचे सहायक संचालक कल्पेश पाटील आणि भूमापन परीक्षक श्रीकांत परदेशी आदींना अटक करण्यात आलेली आहे. या सर्व प्रकारात आणखी काही अधिकारी व कर्मचाऱ्यांचे धागेदोरे उघडकीस येण्याची शक्यता पोलिसांनी वर्तवली आहे.