हद्दपार आदेशाचा भंग करणारा आरोपी हडपसरमध्ये अटकेत; पुणे पोलिसांची यशस्वी कारवाई

 

 

 

 

पुणे : पूर्वी हद्दपार करण्यात आलेल्या एका आरोपीने पुन्हा शहराच्या हद्दीत घुसून पोलिसांच्या आदेशाचे उल्लंघन केल्याच्या प्रकरणात हडपसर गुन्हा शाखेने मोठी यशस्वी कारवाई केली आहे. या प्रकरणातील मुख्य आरोपी तय्यब हमीद शेख (वय ३४) याला काल सायंकाळी अटक करण्यात आली.
पोलिसांनी दिलेल्या माहितीनुसार, आरोपी तय्यब हमीद शेख हा सिल्वर जुबलीच्या बाजूला शिंदे वस्ती, हडपसर येथे राहतो. दिनांक १६ एप्रिल २०२६ रोजी सायंकाळी सुमारे ५.३० वाजता गोवर्धन हॉटेल जवळ शिंदे वस्ती परिसरातून हडपसर गुन्हा शाखेच्या युनिट ५ च्या पथकाने त्याला पकडले.

या आरोपीला पूर्वी न्यायालयाने हद्दपार करण्याचा आदेश दिला होता. मात्र त्याने या आदेशाचे पालन न करता पुन्हा पुणे शहरात प्रवेश केल्याने वानवडी पोलिस ठाण्यात त्याच्याविरुद्ध गुन्हा दाखल करण्यात आला होता. पोलिसांच्या सततच्या नजरकैदेत असलेल्या या आरोपीला शेवटी हडपसर गुन्हा शाखेच्या पथकाने यशस्वीरित्या अटक केली.

ही संपूर्ण कारवाई पोलीस उपायुक्त निखिल पिंगळे आणि सहाय्यक पोलीस आयुक्त राजेंद्र मुळे यांच्या मार्गदर्शनाखाली पार पाडण्यात आली. पथकात पोलीस निरीक्षक सुदर्शन गायकवाड, पोलीस उपनिरीक्षक अभिजीत पवार, पोलिस अमंलदार प्रताप गायकवाड, विनोद शिवले आणि अकबर शेख यांचा समावेश होता.
हडपसर परिसरात अशा प्रकारच्या हद्दपार आरोपींच्या हालचालींवर पोलिस सतत नजर ठेवून आहेत. नागरिकांनीही अशा संशयित व्यक्तींची माहिती तात्काळ पोलिसांना द्यावी, असे आवाहन पोलिसांनी केले आहे.
( प्रतिनिधी–विश्वजीत माने)