३ महिन्यांपूर्वीच अनुकंपावर लागलेली नोकरी गेली! ७० हजारांची लाच घेताना महापालिकेचा बीट निरीक्षक एसीबीच्या जाळ्यात, अखेर निलंबित

 

 

पिंपरी-चिंचवड: महानगरपालिकेच्या ‘ड’ क्षेत्रीय प्रग कार्यालयांतर्गत कार्यरत असलेला स्थापत्य अभियांत्रिकी सहाय्यक तथा अतिक्रमण विरोधी विभागाचा बीट निरीक्षक उमेश अरुण लोंढे (वय २८, रा. शिवराजनगर, रहाटणी) याला ७० हजार रुपयांची लाच घेताना लाचलुचपत प्रतिबंधक विभागाने (ACB) रंगेहाथ अटक केली आहे. पिंपळे गुरव येथील एका इमारतीवर अतिक्रमण विरोधी कारवाई न करण्यासाठी त्याने ही लाच मागितली होती. या धक्कादायक प्रकरणानंतर पालिकेकडून त्याच्यावर निलंबनाची कारवाई करण्यात आली आहे.

नेमके काय आहे प्रकरण?

एक ५८ वर्षीय तक्रारदार यांची पिंपळे गुरव परिसरात एक गुंठा जागा असून, त्यांनी त्यावर तीन मजली इमारत बांधली आहे. मात्र, या बांधकामाला महानगरपालिकेची रीतसर परवानगी घेतलेली नव्हती. या बेकायदेशीर बांधकामाविरोधात पालिकेने नोटीस जारी केल्यानंतर तक्रारदाराने मुंबई उच्च न्यायालयात धाव घेतली होती. उच्च न्यायालयाने तक्रारदाराला पालिकेकडे नियमानुसार दंड भरून हे बांधकाम नियमित करून घेण्याचे निर्देश दिले होते. त्यानुसार तक्रारदाराने पालिकेकडे रीतसर अर्जही सादर केला होता.

उच्च न्यायालयाच्या आदेशाला केराची टोपली:

असे असतानाही, पिंपळे गुरव वॉर्डचे बीट निरीक्षक म्हणून काम पाहणाऱ्या उमेश लोंढे याने तक्रारदाराला बोलावून घेऊन हे तीन मजली बांधकाम अनधिकृत असल्याचे सांगत ते पाडावे लागेल अशी भीती घातली. तक्रारदाराने त्याला उच्च न्यायालयाच्या निकालाची प्रत दाखवली, परंतु लोंढेने त्याकडे साफ दुर्लक्ष केले. या इमारतीवर पालिकेच्या अतिक्रमण विभागाकडून तोडकामाची कोणतीही कारवाई न करण्यासाठी त्याने थेट ७० हजार रुपयांच्या लाचेची मागणी केली.

वाहनतळात सापळा रचून रंगेहाथ अटक:

तक्रारदाराची लाच देण्याची इच्छा नसल्याने त्यांनी याप्रकरणी थेट लाचलुचपत प्रतिबंधक विभागाकडे (ACB) रीतसर तक्रार नोंदवली. त्यानुसार पथकाने गुरुवारी सायंकाळी ५ च्या सुमारास 'ड' क्षेत्रीय कार्यालयाच्या वाहनतळामध्ये (पार्किंग) सापळा रचला. तक्रारदाराकडून ७० हजार रुपयांची लाचेची रक्कम स्वीकारताना उमेश लोंढेला एसीबीने रंगेहाथ दरोडा टाकून पकडले. याप्रकरणी वाकड पोलीस ठाण्यात भ्रष्टाचार प्रतिबंधक कायद्यान्वये गुन्हा दाखल करण्यात आला आहे.

उच्च शिक्षण आणि अवघ्या ३ महिन्यांत नोकरी गमावली:

आरोपी उमेश लोंढे हा बी.ई. सिव्हिल (स्थापत्य अभियांत्रिकी) शिक्षित आहे. अत्यंत महत्त्वाची बाब म्हणजे लाड-पागे समितीच्या माध्यमातून अनुकंपा तत्त्वावर अवघ्या तीन महिन्यांपूर्वीच तो महापालिकेच्या सेवेत रुजू झाला होता. शासकीय सेवेत येताच काही दिवसांतच भ्रष्टाचाराचा मार्ग पत्करल्यामुळे त्याच्यावर निलंबनाची कठोर कारवाई करण्यात आली असून त्याचे संपूर्ण करिअर आता धोक्यात आले आहे.