सौदीचा मोठा निर्णय! नवीन कंपन्यांच्या 'इन्स्टंट वर्क व्हिसा'वर कुऱ्हाड, केवळ ५ व्हिसा मिळणार; नोकरीच्या शोधात असलेल्या भारतीयांना फटका

रियाध: सौदी अरेबियामध्ये नोकरी करण्याचे आणि व्यवसाय उभारण्याचे स्वप्न पाहणाऱ्या परदेशी नागरिकांसाठी, विशेषत: भारतीय कामगार आणि व्यावसायिकांसाठी एक अत्यंत महत्त्वाची आणि मोठी बातमी समोर आली आहे. सौदी सरकारच्या मानव संसाधन आणि सामाजिक विकास मंत्रालयाच्या 'किवा' (Qiwa) प्लॅटफॉर्मने वर्क परमिट आणि व्हिसा वाटपाच्या नियमात महत्त्वपूर्ण बदल केले आहेत. नवीन नियमांनुसार, सौदीतील नव्याने सुरू झालेल्या कंपन्यांसाठी 'इन्स्टंट वर्क व्हिसाची' (तात्काळ कामाचा व्हिसा) मर्यादा कमालीची घटवण्यात आली आहे.

नवीन नियमांमधील महत्त्वाचे निकष:

• २ वर्षांपेक्षा कमी कालावधीच्या कंपन्या: ज्या कंपन्या किंवा स्टार्टअप्स सौदी अरेबियात सुरू होऊन अद्याप दोन वर्षांपेक्षा कमी काळ झाला आहे, त्यांना आता जास्तीत जास्त फक्त ५ इन्स्टंट वर्क व्हिसा दिले जातील. याआधी ही मर्यादा अधिक शिथिल होती.

• २ वर्षांपेक्षा जुन्या कंपन्या: ज्या कंपन्या दोन वर्षांपेक्षा जास्त काळापासून कार्यरत आहेत, त्यांना एकाच अर्जाद्वारे किंवा एकाच आठवड्यात एकाधिक अर्ज करून जास्तीत जास्त ५० इन्स्टंट व्हिसा मिळू शकतील.

• सुरुवातीचा कोटा: 'एस्टॅब्लिशमेंट प्रोग्राम'मध्ये (स्थापना कार्यक्रम) नोंदणीकृत असलेल्या कंपन्यांना सुरुवातीला केवळ २ व्हिसा जारी केले जातील. कंपनीने स्थानिक सौदी नागरिकांना रोजगारात प्राधान्य देऊन 'सौदीकरण' (Saudisation) दर वाढवला, तरच त्यांचा व्हिसा कोटा पुढे वाढवला जाईल.

परदेशी कामगारांसाठी १० कडक अटी:

'किवा' प्लॅटफॉर्मने परदेशी कामगारांची भरती करण्यापूर्वी कंपन्यांसाठी १० कडक अटी लागू केल्या आहेत:

१. कंपनीचे व्यावसायिक नोंदणी प्रमाणपत्र (Commercial Registration) वैध असावे.

२. कंपनी सक्रिय स्थितीत असणे अनिवार्य आहे.

३. सर्व कर्मचाऱ्यांचे वर्क परमिट वैध असावे.

४. कंपनीने 'सौदीकरण' नियमांचे पालन करून 'मिडियम ग्रीन' (Medium Green) किंवा त्यावरील श्रेणीत असणे आवश्यक आहे.

५. वेतन संरक्षण प्रणालीचे (Wage Protection System) काटेकोर पालन करावे लागेल.

६. 'अबशेर' किंवा 'मुकीम' या सरकारी प्लॅटफॉर्मवर पुरेसा निधी शिल्लक असावा.

७. १० किंवा त्याहून अधिक कर्मचारी असलेल्या कंपन्यांना वार्षिक 'सेल्फ-असेसमेंट' (स्वयं-मूल्यांकन) करणे बंधनकारक असेल.

८. 'किवा' प्लॅटफॉर्मवर कर्मचाऱ्यांच्या प्रत्यक्ष कामाच्या जागेची नोंदणी करावी लागेल.

९. सौदीत कामासाठी येणाऱ्या परदेशी कामगाराचे वय किमान १८ वर्षे असावे.

१०. संपूर्ण भरती प्रक्रियेदरम्यान सर्व आवश्यक नियमांची पूर्तता सुरू ठेवावी लागेल.

सौदी सरकारने देशांतर्गत कामगारांना जास्तीत जास्त रोजगार मिळावा आणि परदेशी कामगारांच्या भरती प्रक्रियेवर योग्य नियंत्रण राहावे, या हेतूने हे कडक नियम लागू केले आहेत.