गुंतवणूकदार झाले करोडपती! अवघ्या ५६ रुपयांचा डिफेन्स शेअर ₹१,३०० पार; 'कृष्णा डिफेन्स'ने ४ वर्षांत १ लाखाचे केले तब्बल २४ लाख रुपये

मुंबई: शेअर बाजारात जर योग्य कंपनी निवडून संयमाने पैसा लावला, तर बंपर नफा कमावणे अजिबात अशक्य नाही. गेल्या काही वर्षांत भारतीय संरक्षण (डिफेन्स) क्षेत्रातील कंपन्यांनी गुंतवणूकदारांना भरघोस परतावा दिला आहे. अशाच मल्टीबॅगर कंपन्यांपैकी एक असलेल्या 'कृष्णा डिफेन्स अँड अलाइड इंडस्ट्रीज' (Krishna Defence and Allied Industries) या कंपनीच्या शेअर्सनी बाजारात धुमाकूळ घातला असून गुंतवणूकदारांना मालामाल केले आहे.

 

१ लाखांचे झाले २४ लाख!

शेअर बाजारातील अधिकृत आकडेवारीनुसार, १५ जुलै २०२२ रोजी 'कृष्णा डिफेन्स'चा एक शेअर अवघ्या ५६ रुपयांवर व्यवहार करत होता. त्यानंतर कंपनीच्या व्यवसायातील अभूतपूर्व वाढ, मजबूत ऑर्डर बुक आणि संरक्षण क्षेत्रातील वाढत्या सरकारी संधींमुळे या शेअरने रॉकेट गती घेतली. २५ जून २०२६ रोजी हा शेअर १,३४१.७० रुपयांच्या ऐतिहासिक पातळीवर पोहोचला.

याचाच अर्थ, अवघ्या चार वर्षांपेक्षा कमी कालावधीत या शेअरने तब्बल २,२९६.४३ टक्के इतका अद्भूत परतावा (Return) दिला आहे. जर एखाद्या गुंतवणूकदाराने २०२२ मध्ये या कंपनीत १ लाख रुपये गुंतवले असते आणि ते शेअर्स राखून ठेवले असते, तर आज त्या १ लाखाचे मूल्य वाढून थेट २३.९६ लाख रुपये (सुमारे २४ लाख) झाले असते. केवळ दीर्घकालीनच नव्हे, तर गेल्या एका वर्षातही या शेअरने जवळपास ४३ टक्के परतावा दिला आहे.

कंपनी नेमकं काय करते?

कोणत्याही कंपनीत गुंतवणूक करण्यापूर्वी तिचा व्यवसाय समजून घेणे महत्त्वाचे असते. 'कृष्णा डिफेन्स' ही कंपनी प्रामुख्याने भारतीय लष्कर (Indian Army) आणि भारतीय नौदलासाठी (Indian Navy) अत्याधुनिक संरक्षण उपकरणे आणि सुरक्षा प्रणाली विकसित करण्याचे काम करते. याशिवाय कंपनी दुग्धव्यवसायाशी संबंधित यंत्रसामग्री देखील बनवते. कंपनीचे उत्पादन प्रकल्प गुजरात मधील हलोळ आणि कालोल येथे आहेत, तर तिचे मुख्य संशोधन आणि विकास (R&D) केंद्र बेंगळुरू येथे कार्यरत आहे.

मोठ्या प्रकल्पांमुळे कंपनीने घेतली झेप

आर्थिक वर्ष २०२५-२६ हे कंपनीसाठी टर्निंग पॉईंट ठरले आहे. या कालावधीत कंपनीची सर्वात मोठी उपलब्धी म्हणजे भारतातील सर्वात मोठ्या 'नेव्हल ग्रेड ऑटोनॉमस अंडरवॉटर व्हेईकल' (AUV - पाण्यात चालणारे स्वयंचलित वाहन) प्रकल्पाची सुरुवात. या विशेष प्रकल्पासाठी कंपनीने CSIR-NIO, गोवा कडून अत्याधुनिक तंत्रज्ञान प्राप्त केले आहे.

आर्थिक स्थिती अत्यंत मजबूत; कर्ज जवळपास शून्य

३१ मार्च २०२६ पर्यंत कंपनीकडे १०३.४ कोटी रुपयांच्या निश्चित ऑर्डर्स आणि तब्बल २२१ कोटींचे टेंडर पाईपलाईनमध्ये होते. चौथ्या तिमाहीच्या निकालानुसार, कंपनीचा महसूल ४६ कोटींवरून ६५ कोटींवर गेला आहे, तर निव्वळ नफा ७ कोटींवरून थेट १४ कोटी रुपये झाला आहे. सर्वात महत्त्वाची गोष्ट म्हणजे या कंपनीचे 'डेट-टू-इक्विटी' गुणोत्तर केवळ ०.०१ असून कंपनीवर कर्जाचा भार शून्य मानला जाऊ शकतो. येत्या ३ ते ५ वर्षांत कंपनीने ३० टक्क्यांहून अधिक चक्रवाढ वार्षिक वाढ दर (CAGR) साध्य करण्याचे उद्दिष्ट ठेवले आहे.

(टीप: शेअर बाजारातील गुंतवणूक ही बाजाराच्या जोखमीच्या अधीन असते. गुंतवणूक करण्यापूर्वी तज्ज्ञांचा सल्ला नक्की घ्या.)