चिपळूण: महसूल विभागात खळबळ! जमिनीच्या फेरफार नोंदीसाठी १० हजारांची लाच घेताना मंडल अधिकारी एसीबीच्या जाळ्यात!

चिपळूण: जमिनीची फेरफार नोंद मंजूर करण्यासाठी १० हजार रुपयांची लाच घेताना चिपळूण मंडळाचे मंडल अधिकारी उमेश राजाराम राजेशिर्के (वय ५२) यांना लाचलुचपत प्रतिबंधक विभाग, रत्नागिरी येथील पथकाने बुधवारी २ सप्टेंबर रोजी सायंकाळी सापळा रचून ताब्यात घेतले. मुंबई-गोवा महामार्गावर पाग नाका, पॉवर हाऊस परिसरातील एका हॉटेलजवळ ही कारवाई करण्यात आली.

लाचलुचपत प्रतिबंधक विभागाकडून मिळालेल्या माहितीनुसार, तक्रारदार यांनी मौजे चिपळूण येथील भूमापन क्रमांक १७४/१अ ही जागा खरेदी केली आहे. या जमिनीच्या सातबारा उताऱ्यावर तक्रारदार व त्यांच्या पत्नीचे नाव दाखल होऊन फेरफार नोंद मंजूर व्हावी, यासाठी ग्राम महसूल अधिकाऱ्यांकडे अर्ज करण्यात आला होता. त्यानुसार ११ जून २०२६ रोजी फेरफार नोंद करण्यात आली होती. मात्र, ८ जुलै रोजी मंडल अधिकारी उमेश राजेशिक यांनी सदर नोंद रद्द केली.
तक्रारदार यांनी २ ऑगस्ट रोजी राजेशिर्के यांची भेट घेतली असता, रद्द झालेली फेरफार नोंद मंजूर करण्यासाठी १० हजार रुपयांची लाच मागितल्याचा आरोप आहे. त्यानंतर २३ ऑगस्ट रोजी मोबाइलवर संपर्क साधून फेरफार मंजूर केल्याचे सांगत पुन्हा १० हजार रुपयांची मागणी करण्यात आली. २७ ऑगस्ट रोजीही फेरफार नोंद मंजूर केल्याच्या मोबदल्यात १० हजार रुपयांची मागणी झाल्याचे तक्रारीत नमूद आहे.

याबाबत तक्रारदार यांनी २ सप्टेंबर रोजी लाचलुचपत प्रतिबंधक विभागाच्या रत्नागिरी कार्यालयात लेखी तक्रार दिली. त्यानंतर दीपक लॉजसमोर, भोगाळे, चिपळूण येथे पंचांसमक्ष करण्यात आलेल्या पडताळणीत मंडल अधिकाऱ्यांनी १० हजार रुपयांची लाच मागितल्याचे निष्पन्न झाले. त्यानंतर पाग नाका, पॉवर हाऊस परिसरात सापळा रचण्यात आला.

यावेळी मंडल अधिकारी राजेशिर्के हे तक्रारदार यांच्या वाहनात आले आणि पंचांसमक्ष १० हजार रुपयांची रोख रक्कम स्वीकारल्याचे तक्रारीत नमूद केले आहे. सायंकाळी ६:०५ वाजता त्यांना लाच रकमेसह ताब्यात घेण्यात आले. या प्रकरणी चिपळूण पोलिस ठाण्यात भ्रष्टाचार प्रतिबंध अधिनियम १९८८ (सुधारणा २०१८) मधील कलम ७ अन्वये गुन्हा दाखल करण्याची प्रक्रिया सुरू आहे.

ही कारवाई पोलिस उपअधीक्षक अविनाश पाटील यांच्या मार्गदर्शनाखाली पोलिस निरीक्षक मच्छिद्र जाधव, पोलिस निरीक्षक सुहास रोकडे तसेच लाचलुचपत प्रतिबंधक विभागाच्या पथकाने केली.