कोल्हापूर : कसली आलीय मंदी! कोल्हापुरात जावयाच्या चप्पलसाठी वापरली चक्क दीड किलोची चांदी

कोल्हापूर : एकीकडे सोने आणि चांदीचे दर गगनाला भिडले असताना, दुसरीकडे हौशी माणसांसाठी पैशांची किंमत शून्य असते याचा एक अनोखा प्रत्यय कोल्हापुरात आला आहे. मंदीच्या काळातही आपल्या लाडक्या जावयाचे कोडकौतुक करण्यासाठी कोल्हापूर-सांगली मार्गावरील एका हौशी सासऱ्याने चक्क दीड किलो चांदीची अस्सल 'कोल्हापुरी चप्पल' बनवून घेतली आहे. कोल्हापूर शहरातील एका नामवंत चांदी कारागिराने तब्बल आठ दिवस अहोरात्र परिश्रम करून हा खास चप्पलचा जोड तयार केला आहे.

मिळालेल्या माहितीनुसार, कोल्हापूर आणि सांगली जिल्ह्याच्या सीमेवर वास्तव्य करणाऱ्या एका धनाढ्य पित्याने आपल्या लाडक्या लेकीचे लग्न ठरवले. लेकीच्या लग्नासोबतच जावयाचीही विशेष हौस मोजली पाहिजे, या विचाराने वधूपित्याने जावयाला धोंड्याच्या महिन्यात (अधिक मासात) विशेष भेट देण्याचे ठरवले. यासाठी त्यांनी सांगली जिल्ह्यातील एका सराफाकडे चांदीची चप्पल बनवण्याचे काम सोपवले. या सराफाने हे काम कोल्हापूरच्या कुशल चांदी कारागिराकडे वर्ग केले. दोन कारागिरांनी सलग आठ दिवस मेहनत घेऊन हुबेहूब कोल्हापुरी चप्पल चांदीमध्ये साकारली आहे.

हौसेला नाही मोल!
या अनोख्या आणि राजेशाही चांदीच्या चप्पलची एकूण किंमत तब्बल ४ लाख रुपये इतकी आहे, तर ही चप्पल तयार करण्यासाठी कारागिराला २२ हजार रुपये मजुरी देण्यात आली आहे. विशेष म्हणजे या चांदी कारागिराने याच महिन्यात पिण्याच्या पाण्याचे प्रत्येकी चार आणि पाच किलो वजनाचे दोन चांदीचे पिंप (हंडे) देखील बनवले आहेत. सध्या बाजारात मंदीची चर्चा असली, तरी धोंड्याच्या महिन्यात जावयाला दान करताना सासरच्या मंडळींकडून कोणत्याही प्रकारची काटकसर केली जात नसल्याचे यावरून स्पष्ट होत आहे.