हंताव्हायरसचा भारताला धोका नाही! आयसीएमआर-एनआयव्हीचा दिलासा; अफवांवर विश्वास न ठेवण्याचे आवाहन

पुणे/नवी दिल्ली: जगभरात हंताव्हायरसच्या (Hantavirus) चर्चेमुळे भीतीचे वातावरण असताना, भारतीय वैद्यकीय संशोधन परिषद आणि राष्ट्रीय विषाणू विज्ञान संस्थेचे (ICMR-NIV) संचालक डॉ. नवीन कुमार यांनी भारतीयांना मोठा दिलासा दिला आहे.
हंताव्हायरस हा भारतासाठी सध्या कोणताही तात्काळ सार्वजनिक आरोग्य धोका निर्माण करत नसल्याचे त्यांनी स्पष्ट केले आहे. एका क्रूझ शिपवर दोन भारतीय नागरिकांना हंताव्हायरसची लागण झाल्याच्या वृत्तानंतर चिंता व्यक्त केली जात होती. मात्र, डॉ. कुमार यांनी स्पष्ट केले की, ही प्रकरणे वैयक्तिक स्वरूपाची असून भारतात या विषाणूचा सामाजिक प्रसार (Community Spread) झाल्याचा कोणताही पुरावा नाही.

सर्वात महत्त्वाचे म्हणजे, कोरोना विषाणूच्या तुलनेत हंताव्हायरस हा मानवाकडून मानवाकडे सहजासहजी पसरत नाही. कसा पसरतो हा विषाणू? हंताव्हायरस प्रामुख्याने उंदीर किंवा तत्सम प्राण्यांच्या विष्ठा, लघवी किंवा लाळेच्या संपर्कात आल्याने पसरतो. बंदिस्त जागा, गोदामे किंवा जिथे उंदरांचा वावर जास्त आहे, अशा ठिकाणी हवेतील कणांवाटे हा संसर्ग होऊ शकतो. दक्षिण अमेरिकेतील 'अँडीज' सारख्या काही मोजक्या जाती वगळता, आशियाई देशांमध्ये मानवाकडून मानवाकडे हा संसर्ग होण्याचे प्रमाण अत्यंत दुर्मिळ आहे. लक्षणे आणि तपासणी:हंताव्हायरसची लक्षणे सामान्यतः ५ आठवड्यांपर्यंत दिसू शकतात.

यामध्ये ताप, तीव्र अंगदुखी, डोकेदुखी, थकवा आणि उलट्या यांचा समावेश होतो. गंभीर प्रकरणांमध्ये श्वसनास त्रास किंवा मूत्रपिंडावर परिणाम होऊ शकतो. डॉ. कुमार यांनी सांगितले की, भारतात आयसीएमआर-एनआयव्ही आणि १६५ प्रयोगशाळांचे जाळे संशयित रुग्णांची तपासणी करण्यासाठी सज्ज असून आरटी-पीसीआर (RT-PCR) चाचणीद्वारे या विषाणूचे निदान होऊ शकते. नागरिकांनी घाबरून न जाता स्वच्छता पाळावी आणि उंदीर असलेल्या ठिकाणांपासून सावध राहावे, असा सल्ला प्रशासनाकडून देण्यात आला आहे.