"पुणे हादरले! थेरगावमध्ये १९ वर्षीय सुभान शेखची भररस्त्यात निर्घृण हत्या; प्रेयसीच्या आईच्या सांगण्यावरून गेम केल्याचा संशय"

पिंपरी: पिंपरी-चिंचवडमधील थेरगाव परिसरात शुक्रवारी रात्री रक्ताचा सडा पडला. एका तरुणीसोबत असलेल्या प्रेमसंबंधाच्या वादातून १९ वर्षीय सुभान हमीद शेख (रा. रहाटणी) याची चाकू आणि चॉपरने सपासप वार करून निर्घृण हत्या करण्यात आली. या हल्ल्यात सुभानचा चुलत भाऊ अर्शद शेख हा देखील गंभीर जखमी झाला आहे. याप्रकरणी काळेवाडी पोलिसांनी तत्परता दाखवत दोन संशयितांना अटक केली आहे.

मिळालेल्या माहितीनुसार, मयत सुभान शेख आणि एका तरुणीमध्ये प्रेमसंबंध होते. मात्र, या संबंधाला तरुणीच्या आईचा तीव्र विरोध होता. तरुणीच्या आईचा मित्र असलेल्या विशाल सूर्यवंशी याने सुभानला या प्रेमप्रकरणातून लांब राहण्याची धमकी दिली होती. याच कारणावरून त्यांच्यात आधीपासून वाद सुरू होता.

शुक्रवारी रात्री ११ च्या सुमारास सुभान आणि अर्शद हे थेरगावमधील शिवशंकर कॉलनी परिसरातून जात असताना विशाल सूर्यवंशी आणि अनिकेत सूर्यवंशी यांनी त्यांना गाठले. तिथे पुन्हा वादावादी झाली आणि त्याचे रूपांतर रक्तरंजित हाणामारीत झाले. रागाच्या भरात असलेल्या आरोपींनी सुभानच्या पोटावर, मानेवर आणि हातावर चॉपरने गंभीर वार केले. या भीषण हल्ल्यात सुभानचा जागीच मृत्यू झाला.

भावाला वाचवण्यासाठी मध्ये आलेल्या २१ वर्षीय अर्शद शेख याच्यावरही आरोपींनी वार केले, ज्यात तो गंभीर जखमी झाला असून त्याच्यावर रुग्णालयात उपचार सुरू आहेत. घटनेची माहिती मिळताच काळेवाडी पोलिसांनी घटनास्थळी धाव घेत तपास सुरू केला आणि काही तासांतच आरोपींना बेड्या ठोकल्या. या घटनेमुळे थेरगाव परिसरात दहशतीचे वातावरण पसरले आहे.